Қазір бұйрық жобасы ҚР Денсаулық сақтау министрлігі тарапынан жүзеге асырылу кезеңінде, деп хабарлайды Buqara.kz сайтының тілшісі.

Өткен жылдың желтоқсан айында республикалық бұқаралық ақпарат құралдарында балаларға арналған тегін дәрі-дәрмектер тізімі кеңейтілетіндігі жайлы ақпарат тараған еді. Педиатрдың нұсқауымен оларды кез келген дәріханалардан сатып алуға болады.

– Кәмелеттік жасқа толмаған балалар дәрілерді тегін алатын болады. Тегін дәрілер қатарына ыстықты түсіретін және гистаминге қарсы препараттар жатады. Емханаларда олардың рецебі беріледі. Біздің дәріханаларда да ата-аналар балалары үшін оларды қайтарымсыз ала алады. Біреулер үшін дәрі-дәрмек алу аса қиындық тудырмағанымен екіншілерінің қалтасы көтермей жатады. Ал 2020 жылдан бастап дәрілік препараттар тегін беріледі, – дейді «СК-Фармация» ЖШС төрағасының міндетін атқарушы Берік Шәріп.

Аймақтағы әлеуметттік медициналық сақтандыру қорындағылар бұйрық жобасы қазір еліміздің Денсаулық сақтау министрлігінің талқылауында екендігін жеткізді. Дәрі-дәрмектердің тізімі бекітілмегендіктен нақты атауларын айту мүмкін болмай тұрған көрінеді. Десе де өңірдегі ӘМСҚ филиалындағылар жағдайды бақылауға алу үшін арнайы механизм құрылғандықтан бұл орайда дәрі-дәрмек тапшылығы болмайтындығын алға тартты.

– Тапшылық болдырмас үшін амбулаториялық-емханалық қызмет көрсететін ұйымдар дәрілер қажеттілігін анықтау және оларға уақтылы тапсырыс беру үшін ойластырылған алгоритммен жүріп отырулары тиіс, – дейді аймақтық қор өкілдері.