Алексей Полторанинді допингпен қамтамасыз еткен дәрігер алты жылға абақтыға жабылуы мүмкін

145
көрілім
Фотосурет old2.aikyn.kz сайтынан

Бүгін Германияның Мюнхен қаласында біршама спортшыны тыйым салынған препаратпен қамтамасыз еткен неміс дәрігері Марк Шмидтке қатысты сот ісі басталды, деп хабарлайды Buqara.kz сайтының тілшісі.
Өткен жылы Әлем чемпионатында бақ сынағалы тұрған бір топ шаңғышыны Австрия мен Германияның құқық қорғау органдарының қызметкерлері құрықтаған еді. Олардың арасында жерлесіміз, риддерлік Алексей Полторанин де бар болатын. Жалпы, жасы отыздан асса да әлі бірқатар халықаралық додаларда жүлде алатын мүмкіндігі бола тұра, неліктен мұндай қадамға барғаны талай жанкүйеріне жұмбақ болып қалғаны сөзсіз. Сол кезде жерлесімізден бөлек, Австрия және Эстония елдері спортшыларының да басы дауға қалған болатын. Айта кетейік, айыпталған тек шаңғышылар ғана емес, жеңіл атлет, велошабандоз және конькимен жүгірушілер де бар. Сонда оларды допингпен қамтамасыз еткен кім? «Допинг докторы» деп кімді айтты? Әлемдік деңгейде мамандар талқысына түскен жағдай бойынша БАҚ өкілдері неміс дәрігері Марк Шмидтдің тиісті препарат ұйымдастырып, соны спортшыларға сату арқылы қомақты қаржы иемденіп отырғандығын жарыса жазды. Ізін суытпай дәрігерді абақтыға жапты. Белгілі болғандай, тыйым салынған препаратты шаңғышыларға бүркеншік есім беру арқылы табыстаған. Мюнхеннің бас прокуроры Кай Грэбердің сөзінше, спортшылардың кодтық есімдері түрліше.
– Қазақстандық шаңғышы Алексей Полторанин «Эйнштейн», хорватиялық велошабандоз Кристиан Дюрасек «Тriple X», ал оның австриялық әріптесі Стефан Денифльді «Есімсіз» деп аталған. Олардың әрбірі жылына 5000-15000 евро аралығында қаржы төлеп тұрулары тиіс-тін. Бұл үрдіс қолма-қол ақша төлеумен жүзеге асты, – деді ол.
Жалпы, қылмыс шеңберіне 50 спортшы кіріп тұр. Оның 21-і евррпалық мемлекттерден.
– Сонда 21-ді 5000 евроға көбейтсек бір маусымға 100 мың евро шығады, – деді Кай Грэбер.
Енді Марк Шмидт спортшының денсаулығына нұқсан келтіретін допинг сатып, заңсыз коммерциялық емес қызметпен айналысқаны үшін айыпталып отыр. Suddeutsche Zeitung мәліметінше, 42 жастағы дәрігерге 4 жылдан 6 жылға дейін бас бостандығынан айыру жазасы қолданылуы мүмкін.