Жол қауіпсіздігі мен жылдамдық сақтауды қамтамасыз ету мақсатында «Қазавтожол» АҚ ШҚО филиалы патрульдік полиция машиналарының үлгілерін орнатты, деп хабарлайды Buqara.kz тілшісі.

Олардың бір ерекшелігі – қараңғыда да жұмыс істейтін жылтыр маяктары бар және электр қуатын күннен алады.

Бұл жұмыс ШҚО Полиция басқармасының ұсынысымен жүргізіліп отыр. Тәртіп сақшылары жолдардың қауіпті учаскелерін анықтады. Олар Өскемен-Риддер, Өскемен-Семей, Өскемен-Алтай жол учаскелерінде қолданылады.

Қараңғы жерде маяктар қашықтықтан жұмыс істейді. Көшірмені нағыз патрульдік машинадан ажырату мүмкін емес. Жүргізушілер жылтыраған маяктарды көргенде жылдамдықты бірден баяулатады.

Жол-көлік оқиғаларының талдауы көрсеткендей, жыл басынан бері белгіленген жылдамдықтан асып кетуіне байланысты 303 жазатайым оқиға тіркелген. Осындай апаттар кезінде 530-дан астам адам зардап шегіп, олардың 66-ы қайтыс болған.