ШҚО-да 17 мың тонна аcтық ұрлағандардың ісі қаралуда

33
көрілім

Арнайы прокуратура басқармасының қызметкерлері мемлекеттік ресурстардан бидай ұрлау фактісі бойынша сотқа дейінгі тергеуді аяқтады, деп хабарлайды Бұқара.кз сайтының тілшісі.

Прокурорлардың мәліметтері бойынша, «Азық-түлік келісімшарт компаниясы», Ұлттық компания АҚ, «Шығыс-Астық БҚК» ЖШС-мен 2017 жылдың желтоқсанында бидайды сақтауға келісімшарт жасаған. Азық-түлік өнімдерінің ұрлығы 2018 жылдың қыркүйегінен 2019 жылдың ақпанынан дейін жалғасқан.

Бидайдың жетіспеушілігі ағымдағы жылдың наурызында жедел ақпарат арқылы анықталды. Бидай қабылдау кәсіпорнының Семей қаласында және Бородулиха ауданының Ауыл станциясында орналасқан қоймаларында полиция және прокуратура қызметкерлері тексеру жүргізген.

Бидай, күнбағыс, қарақұмық қоймалардан шығарылып, үшінші тұлғаларға сатылған. Ұрланған өнімдерді жасыру үшін ЖШС басшысының нұсқауымен қоймаларда шөп үйінділерінен, қар мен қалдықтардан муляж жасалып, сыртына бидай себілген. Осы қылмыстық әрекеттер нәтижесінде бағасы 1,4 млрд.теңге құрайтын 17 мың тонна азық-түлік өнімдері ұрланды.

Биылғы жылдың 10 қазанында «Шығыс-Астық НҚК» ЖШС-нің директорына қатысты қылмыстық іс сотқа жолданды. Ол өзіне сеніп тапсырылған мүлікті иемдену (ысырап ету) бойынша айыпталуда. Оған мүлкін тәркілеу мен 7 жылдан 12 жылға дейін бас бостандығынан айырылу жазасы тағайындалуы мүмкін.