Шығыс Қазақстан облысындағы 100 елді мекенді абаттандыруға арналған бағдарлама әзірленген болатын. Бүгінде осы мақсаттағы бірқатар жобалар мәресіне жетті, деп хабарлайды Бұқара.кз сайтының тілшісі.

Жалпы өңірдің қала-аудандарын абаттандыру үшін 4,2 млрд бөлініпті. Оның ішінде 1,2 млрд теңге аудан орталықтарына жұмылдырылған. Бұл жайлы бүгінгі «Nur Otan» партиясы Шығыс Қазақстан облыстық филиалының Саяси кеңесі бюросы отырысында айтылды.

- 3 бағытта жұмыс істеп жатырмыз. Әр елді мекенде абаттандыру, көгалдандыру, асфальттау жұмыстары жүргізілуде. Қазірде аудан орталықтарындағы 24 жоба толықтай аяқталды, - дейді ШҚО Энергетика және ТҮКШ басқармасының басшысы Мұрат Мұсатаев.

Алайда барлығы шенеуніктің есебіндегідей керемет болмай шықты. Кейбір аудандар тиісті жұмыстарды мерзімінде орындамауда.

- 1 қарашада барлығын қатаң тексеремін. Абаттандыру жұмыстарын белгіленген кестеге сәйкес жүргізу керек. Осы тұрғыда Көкпекті, Үржар аудандары жақсы көрсеткіштерге ие, - деді облыс әкімі Даниал Ахметов.

Аймақ басшысы елді мекендерді абаттандырға келесі жылы да қомақты қаражат бөлінетіндігін айтты.

Талғатжан МҰХАМАДИЕВ