Алдағы уақытта Ұлан ауданының аумағында орналасқан Жоғарғы Тайынты (Шыбындыкөл) көліне апаратын бес шақырымдық жолға асфальт төселіп, демалушыларға жағдай жасалуы ықтимал, деп хабарлайды Бұқара.кз сайтының тілшісі.

– Негізгі тасжолдан Шыбындыкөлге дейінгі бес шақырымдық жолды жөндеу мәселесін қарастыру қажет, – деді облыс әкімдігінің кеңейтілген аппарат отырысында өңір басшысы Даниал Ахметов. – Керемет жер, құмды жағажай, сұлу табиғат қоршаған көлге апаратын жол өте нашар, сондықтан Туризм басқармасы Жолаушылар көлігі басқармасымен бірлесе отырып жоба дайындауы қажет. Облыс орталығынан бар-жоғы 85 шақырымдық жердегі көл Сібе көлдеріне бәсекелес бола алады, сол себепті Өскеменнен Тайынтыға дейінгі аралық орташа жөндеумен қамтылуы қажет.

Сондай-ақ, Тайынты көлінің жағасында ыңғайлы ғимараттың барын алға тартқан облыс әкімі Жұмыспен қамту басқармасына аталмыш ғимаратты алдағы уақытта қарттарды сауықтыру орталығына қайта жабдықтау мәселесін қарастыруды тапсырды.