Үржар ауданына жаңа әкім тағайындалды

120
көрілім

ШҚО әкімі Даниал Ахметовтың бұйрығымен осы уақытқа дейін Алтай ауданын басқарған Нұржан Тоқсейітов Үржар ауданының әкімі болып тағайындалды, деп хабарлайды Buqara.kz тілшісі.

Нұржан Тоқсейітов — 1960 жылдың 6 шілдесі күні ШҚО Бесқарағай ауданында дүниеге келген. Еңбек жолын 1977 жылы «Семенов» кеңшарында жұмысшы болып бастаған. 1986 жылы Семей зоотехникалық-ветеринарлық институтын «Ветеринарлық медицина» мамандығы бойынша тәмәмдаған. 1993 жылы Мәскеудегі Коваленко атындағы Бүкілресейлік ғылыми-тәжірибелік ветеринарлық медицина институтының аспирантурасын, 2001 жылы Қазақ мемлекеттік заң академиясын бітірді.

1994 жылы Мәскеудегі Ресей-Венгрия бірлескен кәсіпорнында жетекші маман болып жұмыс істейді.

1995 жылдан 1998 жылға дейін ол «Семей-Агро» ЖШС, «Ақбұлақ» АҚ, «Кен-Холдинг» ЖШС сияқты кәсіпорындарды басқарды.

2000-2003 жылдары ШҚО жануарлар мен өсімдіктер әлемін мемлекеттік бақылау басқармасының бастығы, 2003-2008 жылдары Алматы қаласындағы «Алрун» ЖШС бас директоры болып жұмыс істеді.

2008-2010 жылдар аралығында облыстық ауыл шаруашылығы басқармасы бастығының орынбасары, 2010-2015 жылдар аралығында Зырян ауданы әкімінің орынбасары қызметіне сайланды.

2015 жылдың сәуір-қазан айларында ШҚО ветеринария басқармасын басқарды.

2015 жылдың қазанынан 2017 жылдың наурызына дейін Бесқарағай ауданының әкімі қызметтерін атқарып, соңғы үш жылда Алтай аймағын басқарды.