ШҚО-да дүкен ұрлығына қатысы бар күдіктілер анықталды

Тергеу мәліметінше, ер адамдар қылмысты алдын ала сөз байласып жасаған. Дүкеннен төсек-орын жабдықтарының жиынтықтары мен бес құты антиперспирант ұрланған. Келтірілген материалдық шығынның жалпы сомасы - 120 мың теңге.
- Жедел іздестіру шаралары барысында полиция қызметкерлері үш адамның да жеке басын анықтады. Күдіктілер Глубокое ауданының тұрғындары болып шықты. Аталған дерек бойынша ҚР Қылмыстық кодексінің «Ұрлық» бабы бойынша қылмыстық іс қозғалды. Күдіктілерге қатысты келу туралы міндеттеме түріндегі процестік мәжбүрлеу шарасы таңдалды, - делінген ресми хабарламада.

Қазақстанда көлікті техникалық тексеру қызметінің баға индексі 34 пайызға өсті

Статистикалық мәліметке сәйкес, биылғы үшінші тоқсанда көлік құралдарын техникалық бақылау қызметінің өндірушілер бағасының индексі 2025 жылдың сәйкес кезеңімен салыстырғанда 33,9 пайызға жоғарылаған. Ал екінші тоқсанмен салыстырғанда өсім 14,8 пайызды құрады.

Дегенмен бұл көрсеткіш әрбір жүргізуші үшін техникалық тексеру құны дәл осындай мөлшерде қымбаттады дегенді білдірмейді. Ұлттық статистика бюросы қызмет көрсетушілер бағасының өзгерісін есептейді. Сондықтан нақты жүргізушілер төлейтін сома өңірге және қызмет көрсету орталығына байланысты әртүрлі болуы мүмкін.

Техникалық тексеру қызметінің бағасы көлік иелері үшін маңызды шығындардың бірі саналады. Әсіресе, жолаушылар мен жүк тасымалдауға пайдаланылатын көліктердің техникалық жағдайын белгіленген мерзімде тексеріп отыру міндетті.

Статистикаға сүйенсек, техникалық бақылау қызметі баға индексінің жылдық өсімі жоғары болған бағыттардың қатарына кірген. Салыстыру үшін, көмір мен коксты сақтау қызметінің баға индексі бір жылда 34,1 пайызға, ал астық сақтау қызметінікі 9,2 пайызға өскен.

Өскемендегі Республика алаңы қайта жаңғыртылуы мүмкін

Бұған дейін қала тұрғындары алаңдағы ағаштарға қойылған түрлі белгіні байқаған болатын. Өскемен әкімдігінің баспасөз қызметі мәліметінше, бүгінде жобалау ұйымы аумақты қайта жаңғырту бойынша ұсыныстар әзірлеп жатыр. Зерттеу жұмыстарына дендролог пен геодезист тартылған.
Ағаштарға қойылған белгілерге сәйкес, крестпен белгіленгендерін кесу, ал шеңбермен белгіленгендерін сақтау алдын ала қарастырылған. Дегенмен әкімдік бұл белгілердің әзірге бастапқы сипатта екенін атап өтті. Жобалық ұсыныстар қаралып, тиісті келісімдерден өткен соң белгілі болады.
Жоба аясында Республика алаңын кешенді абаттандырып, кейін аумақты көгалдандыру жоспарланған.

Өскеменде «Мәдениеттегі Өзбекәлі тұлғасы» кітап оқу сайысы өтті

Іс-шара республикалық «Кітап оқитын ұлт» жобасы аясында қолға алынды. Сайысты облыстық Жастар ресурстық орталығы мен «Асық» әдеби-мәдени клубы бірлесіп өткізді. Ұйымдастырушылар сөзінше, сайыстың басты мақсаты – жастар арасында кітап оқу мәдениетін қалыптастыру.

– Мемлекет басшысы мамыр айында кітап оқу мәдениетін қалыптастыруға бағытталған жарлыққа қол қойған болатын. Осы бастаманы қолдап, «Кітап оқитын ұлт» жобасын кеңінен насихаттау мақсатында сайыс ұйымдастырдық. Сонымен қатар жастарға Өзбекәлі Жәнібектің тұлғасын танытып, оның өнегелі өмірі мен еңбегін дәріптеуді көздедік. Байқауға өңірдегі колледждер мен жоғары оқу орындарынан 40 студент тіркелді, – деді Жастар ресурстық орталығының басшысы Айдос Әділбекұлы.

Сайыс төрт кезеңнен тұрды. Атап айтқанда, қатысушылар алдымен «Белес» іріктеу кезеңінен өтіп, одан кейін «Көңілдегі көрікті ой» сұрақ-жауап кезеңінде білімдерін сынады. Үшінші кезеңде «Қаламгер майданы» аясында эссе жазса, соңғы «Аманат» кезеңінде берілген тақырып бойынша өз ойларын баяндады. Нәтижесінде 40 қатысушының 33-і іріктеуден өтіп, жеті студент финалға жолдама алды.

Сайыс қорытындысында үшінші орынды С. Аманжолов атындағы Жоғары колледж студенті Гүлім Аманбайқызы иеленді. Екінші орынға осы оқу орнының студенті Альас Маратбек лайық деп танылды. Ал бас жүлде С. Аманжолов атындағы ШҚУ-дың 2-курс студенті Ақниет Ержақанға бұйырды. Жеңімпаздарға ақшалай сыйлықтар мен дипломдар табысталды.

Айта кетейік, ұйымдастырушылар келесі жылдың ақпан айында Қасым тұлғасына арналған кезекті танымдық сайыс өткізуді жоспарлап отыр.

Әдемі АМАНГЕЛДІ

2 - 8 қараша аралығына арналған жұлдыз-жорамал

Тоқты
Кейбір Тоқтылар шешімді өз беттерімен қабылдауды жөн көреді. Осы әрекетіңізден сүйіктіңіздің сізден көңілі қалады. Жалғызбасты Тоқтыларға жуық арада екінші жартысын табу қиынға түседі, әйтсе де айналаға көз сала жүргеннің еш әбестігі жоқ.
Торпақ
Дос-жарандарыңызбен жақын қарым-қатынас сақтағыңыз келсе олардың әр айтқанына көңіл-күйіңізді түсірмей, көмек сұраса қолұшын беруге әзір жүріңіз. Сезім қылын бекіте түскіңіз келсе ұдайы шындықты айтуға дағдыланыңыз.
Егіздер
Осыған дейін бір көргеннен ғашық болу дегенге сенбеп пе едіңіз? Онда сондай жайт жуық арада басыңыздан өтуі ғажап емес. Жағымды эмоция мен мөлдір сезімнің ескегін есесіз.
Шаян
Қазір сүйіктіңізбен алыс жақтарға сапар шегіп, бойжазып қайтуға болады. Осы бастан жоспар құра бастаңыз. Бұл үшін үйдегі тізгін отағасына берілуі тиіс, себебі кей сәттерде маңызды шешім қабылдайтын солар.
Арыстан
Көптен бері тұрмыс құруды ойлап жүрген болсаңыз қандай адам талғамыңызға сай келетінін анықтап алыңыз. Өмірлік серігіңізді таңдауда асықпаған жөн. Бұл жерде Жұлдыздар алғаш көрген жанмен көңіл жарастыруды әбестік санайды.
Бикеш
Ескі таныстарыңызбен қарым-қатынасыңыз қандай? Бәлкім, солардың арасында жүрген шығар ғашығыңыз? Жалғызбасты Бикештерге көпшілік арасында немесе қоғамдық жерлерде жүрген дұрыс.
Таразы
Қазір сіз үшін мына қағида маңызды: шешім қабылдадың ба, артынан күмән келтірудің еш жөні жоқ. Ұжымда білгенін бөлісіп жүретін әріптесіңіздің бойынан кемшілік іздегенше, сенім артыңыз.
Сарышаян
Досыңызбен «менікі дұрыс, сенікі қате» деп арақатынасты анықтаудың қажеті жоқ. Осындай келеңсіздіктерді айналып өтуге тырысыңыз. Кейбір Сарышаяндар ұжымдағы жұмысын ысыра тұрып, тынығып алуды құп көреді.
Мерген
Қазір жаңа жоспар бекітіп, апта соңына қарай соны жүзеге асырудың қамын ойлаңыз. Жақындарыңыздан әлденені жасырып қалуды ойламаған да жөн. Шындықтың бір күні сыртқа шығатынын ескеріңіз.
Тауешкі
Маңызды тірліктерді біржақты етіп болған соң басқасын бастауға асықпаңыз. Аз уақытқа болса да демалыс қажет. Отау құрып, жеке өмірінде тұрақтылық орнаған Тауешкілерге өмірлік серігіне көп көңіл бөлгендері абзал.
Суқұйғыш
Дәл қазір некеге отыруға асықпаған жөн. Махабаттарыңыз баянды ма, әлде уақытша ма, осыны анықтау үшін уақыт қажет. Кейбір Суқұйғыштар сезім қылына қылқынып, сүйіктісімен қосыла алмай жаны қиналады. Сол үшін өмірлік серігіңізді таңдарда жүрек үніне құлақ тұрып, ұтымды шешім қабылдай білген жөн.
Балықтар
Бұрынғы ғашықтық сезімін қайта маздату үшін бар күшіңізді салыңыз. Бәлкім, жылдам әрекет етіп, дер кезінде қимылдай білсеңіз ұнатқан адамыңызбен қайта көңіл қосасыз. Қазір төзімділік пен көрегенділік танытатын кез.

Қазақстандықтар 2027 жылғы Жаңа жылда төрт күн қатарынан демалады

2027 жылы 1 қаңтар жұмаға, ал 2 қаңтар сенбіге сәйкес келеді. Мерекелік күн сенбіге түскендіктен, демалыс 4 қаңтарға, дүйсенбіге ауыстырылады. Осылайша, бес күндік жұмыс аптасымен жұмыс істейтін қазақстандықтар 1-4 қаңтар аралығында демалады.

Төрт күндік демалыстан кейін 5 қаңтар, сейсенбіде жұмыс басталады. 6 қаңтар да – жұмыс күні. Ал 7 қаңтар, бейсенбіде православ христиандарының Рождество мерекесіне байланысты қазақстандықтар тағы бір күн демалады.

8 қаңтар, жұма – жұмыс күні. Одан кейін 9 және 10 қаңтарда әдеттегі сенбі-жексенбілік демалыс болады.

Осылайша, 2027 жылғы қаңтарда бес күндік жұмыс аптасы бойынша 18 жұмыс күні және 13 демалыс күні бар. Алты күндік жұмыс аптасымен еңбек ететін азаматтардың демалыс кестесі өзгеше болады.

Өскеменде жаңа тергеу изоляторы салынып жатыр

Жаңа тергеу изоляторы Защита шағынауданында бой көтереді. Бүгінде құрылыс алаңында құрылыс-монтаж жұмыстары жүріп жатыр.
Облыстық Қылмыстық-атқару жүйесі департаментінің баспасөз қызметі ұсынған мәліметінше, қазіргі тергеу изоляторы 1720 жылы құрылған. Ал биыл ғимаратқа 306 жыл толды.
– Соңғы үш жылда қауіпсіздікке деген талаптар, инженерлік жүйе мен арнайы контингенттерді ұстау шарттары өзгерген. Сондықтан жаңа нысан құрылысы қажет. Біздің басты мақсат – жай ғана жаңа ғимарат салу емес, барлық қауіпсіздік, заң мен адамгершілік талаптарына сай келетін заманауи тергеу изоляторын құру, – деді департамент басшысы, әділет полковнигі Рүстем Тұңғышбаев.
Айта кетейік, аймақтың қылмыстық-атқару жүйесін жаңғыртудың негізгі инфрақұрылымыдық жобаларының бірі болатын бұл құрылыс облыстық әкімдік қолдауымен салынуда.

Өскемендегі Назарбаев даңғылындағы аркаға жарық орнатылды

Аллеядағы кіреберіс арка жөнделіп, оған жарықтандыру жүйесі орнатылды. Сонымен қатар абаттандыру аясында жарық шамдарын ауыстыру жоспарланған.
Арка 2014 жылы орнатылды. Бастапқыда осындай құрылымдарды аллеяның екі жағына орналастыру көзделгенімен, кейін бұл жоспардан бас тартылған.

Қазақстанның аграрлық экспортындағы өңделген өнімнің үлесі 54%-дан асты

Нәтижесінде аграрлық экспорттың жалпы құнындағы өңделген өнімнің үлесі 54,1%-ға жетті. Осылайша, аграрлық сектордың экспорттық түсімінің жартысынан астамы өңделген өнімдер есебінен қалыптасып отыр. Бұл отандық аграрлық экспорт құрылымындағы сапалық өзгерістерді және қазақстандық өнімдердің сыртқы нарықтардағы бәсекеге қабілеттілігінің артып келе жатқанын көрсетеді.

Экспорт өсімінің негізгі қозғаушы күштерінің бірі – астық өңдеу саласы. 2025/2026 маркетингтік жылында астық пен ұн экспорты астық баламасында рекордтық 16 млн тоннаға жетті.

2026 жылғы қаңтар–тамыз аралығында шетелге 1,38 млн тонна бидай және бидай-қара бидай ұны экспортталды. Оның жалпы құны шамамен 400 млн АҚШ долларын құрады. 2025 жылдың сәйкес кезеңімен салыстырғанда экспорттың заттай көлемі 23%-ға, ал экспорттық түсім 36%-ға өсті.

Май және тоңмай өнеркәсібінде де оң динамика байқалады. Күнбағыс, мақсары және мақта майларының экспорты 49%-ға өсіп, 453 млн доллардан 673 млн долларға жетті. Ал рапс және қыша майларының экспорты 2,3 есе артып, 40 млн доллардан 90 млн долларға дейін өсті.

Басқа да бірқатар өнім түрлері бойынша айтарлықтай өсім тіркелді. Атап айтқанда, мал азығына арналған ұн экспорты құндық мәнде 61%-ға артып, 359 млн доллардан 578 млн долларға жетті. Заттай көлемде жеткізілімдер 44%-ға өсіп, 2,5 млн тоннаны құрады.

Сиыр етінің экспорты 78%-ға ұлғайып, 92 млн доллардан 164 млн долларға дейін өсті. Өнімнің заттай көлемі 13%-ға артып, өткен жылғы 26 мың тоннадан 29 мың тоннаға жетті.

Сонымен қатар май өңдеу өнімдері – күнжара мен шрот экспорты 42%-ға өсіп, 79 млн доллардан 113 млн долларға дейін ұлғайды. Заттай көлемде жеткізілімдер 39%-ға артып, 430 мың тоннадан 597 мың тоннаға жетті.

Өндірістік және экспорттық әлеуетті одан әрі арттыру мақсатында Ауыл шаруашылығы министрлігі мемлекеттік қолдаудың кешенді шараларын жүзеге асыруда. Олар жеңілдетілген кредит беруді, инвестициялық субсидиялауды және салықтық преференцияларды қамтиды. 2024–2026 жылдары өңдеуші кәсіпорындардың айналым қаражатын толықтыруға шамамен 230 млрд теңге бағытталды. Бұл шаралар өндірістік процестердің үздіксіздігін қамтамасыз етуге, кәсіпорындардың өндірістік қуаттарын толық пайдалануға және сұранысқа ие өнімдер шығаруды ұлғайтуға бағытталған.

Астықты терең өңдеуді дамытуға ерекше назар аударылып отыр. Қазіргі уақытта Қазақстанда жылына жалпы қуаты 510 мың тонна шикізатты өңдеуге жететін үш мамандандырылған кәсіпорын жұмыс істейді. Соңғы бес жылда елімізде крахмал өнімдерін өндіру көлемі 2,1 есе артты, ал биоэтанол өндірісі 21,2 мың тоннаға жетті.

Саланы одан әрі дамыту үшін жалпы құны шамамен 4 млрд АҚШ долларын құрайтын, жылына 5,8 млн тонна шикізатты өңдеуге қауқарлы алты ірі инвестициялық жоба әзірленді. Оларды іске асыру крахмал, глютен, аминқышқылдары мен биоэтанол өндірісін жолға қоюға, терең өңделген отандық өнімдердің түр-түрін едәуір кеңейтуге және еліміздің экспорттық әлеуетін нығайтуға мүмкіндік береді.

Инвестициялық бастамаларды іске асыру жұмыстары қазірдің өзінде қарқын алды. Биыл Түркістан облысында жылына 150 мың тонна жүгеріні өңдеуге арналған «Қазкрахмал» зауыты пайдалануға берілді. Жамбыл облысында Fufeng Group компаниясының өндірістік кешені құрылысының бірінші кезеңі аяқталды.

Qostanai Grain Industry және Tiryaki Agro жобаларын іске асыру жалғасып жатыр. Бұдан бөлек, Ақмола облысында тағы екі жаңа өндіріс орнын іске қосу жоспарланған.

Сонымен қатар болашақ кәсіпорындарды тұрақты шикізат базасымен қамтамасыз ету шаралары қабылдануда. Атап айтқанда, Қазақстанда жүгері егісінің көлемі 60%-ға ұлғайып, 106 мың гектарға жетті.

Өңдеу өнеркәсібін дамыту – отандық агроөнеркәсіптік кешенді құрылымдық жаңғыртудың негізгі бағыттарының бірі. Инвестициялық жобалар мен мемлекеттік қолдау шараларын іске асыру экспорттың басым бөлігін шикізат құрайтын модельден дайын өнімдер мен терең өңделген тауарлардың үлесін арттыруға бағытталған модельге біртіндеп көшуге мүмкіндік береді.

Бұл отандық ауыл шаруашылығы шикізатына тұрақты сұранысты қамтамасыз етіп, фермерлік шаруашылықтарды дамытуға қосымша мүмкіндіктер ашады, олардың табыстылығын арттырады және ел ішінде жаңа өндірістік тізбектердің қалыптасуына ықпал етеді.

Түптеп келгенде, терең өңдеу көлемін ұлғайту Қазақстанға экспорттық түсімді арттырып қана қоймай, халықаралық нарықтарда қосылған құны жоғары, бәсекеге қабілетті өнімдердің сенімді жеткізушісі ретіндегі позициясын нығайтуға мүмкіндік береді.

Қазақстандағы ең арзан қонақүй Өскеменде

Ұлттық статистика бюросының мәліметінше, ең жоғары көрсеткіш Алматы қаласында тіркелген.
Статистикаға сәйкес, шаһарда қонақүй тәулігіне 35 821 теңгеге түседі. Екінші орында Орал қаласы тұр. Мұнда қонақүйде бір күн түнеу құны – 27 956 теңге. Ал Петропавлда қонақүйге бір тәулікке 25767 теңге жұмсау қажет.
Ең арзан қалалардың қатарында Семей мен Өскемен бар. Өскеменде 14 444 теңге болса, Семейде бұл баға – 12 151 теңге.