29 тамызда ҚР Конституциясының 30 жылдығы қарсаңында Алтай ауданының Октябрьск кентінде жаңа дәрігерлік амбулаторияның техникалық ашылуы өтті, деп хабарлайды Buqara.kz сайтының тілшісі.

Шараға аудан әкімінің орынбасары Жанна Асқарова, аудан мәслихатының төрағасы Лариса Гречушникова, жергілікті қоғамдастық өкілдері, медицина қызметкерлері, еңбек ардагерлері және ауыл тұрғындары қатысты.

Өзінің құттықтау сөзінде Жанна Асқарқызы аудан әкімі Ренат Құрмамбаевтың атынан жиналғандарды еліміздің негізгі Заңының мерейтойымен құттықтап, мұндай нысандардың ашылуы қазақстандықтардың, әсіресе ауылдық жерлерде өмір сүру сапасын арттыруға бағытталған мемлекеттік саясаттың жемісі екеніне тоқталды.

- Әлеуметтік инфрақұрылымды дамыту - мемлекетіміздің басым бағыттарының бірі. Бүгінде біз Октябрьск кентінің тұрғындарын білікті медициналық көмекпен қамтамасыз ететін жаңа дәрігерлік амбулаторияны ашып отырмыз. Бұл азаматтарымыздың денсаулығына, қауіпсіздігіне және әл-ауқатының артуына қосқан үлесіміз, - деді аудан әкімінің орынбасары өз сөзінде.

Аудан мәслихаттың төрағасы Лариса Гречушникова да өз құттықтауын білдірді.

- Бұл дәрігерлік амбулаторияның ашылуы – жай ғана әлеуметтік нысан емес, ауыл тұрғындарының медициналық қызметке тең қолжетімділігін қамтамасыз ету жолындағы маңызды қадам. Конституцияда әрбір азаматтың денсаулық сақтау құқығына кепілдік берілген, бүгінде біз бұл ережелердің нақты өмірде қалай жүзеге асып жатқанын көріп отырмыз. Мұндай жобалар мемлекет тарапынан халыққа жасалып жатқан қамқорлықтың үлгісі және өңірдің тұрақты дамуына жасалған сенімді қадам, - деді.

Жаңа дәрігерлік амбулатория заманауи медициналық құрал-жабдықтармен жабдықталған, бұл амбулаториялық қызметтердің кең спектрін – профилактикалық тексеруден бастап, алғашқы медициналық көмекке дейін көрсетуге мүмкіндік береді. Мекемеде науқастарды қабылдауға да, медицина қызметкерлерінің жұмысына да қолайлы жағдай жасалған.

Жергілікті тұрғындар олардың мұқтаждарына көңіл бөлінгеніне ризашылықтарын, нысанның ашылуына жылы лебіздерін білдірді. Зейнеткер, жергілікті қоғамдастық мүшесі Евгений Семенюктің айтуынша, мұндай шара мерекеге нағыз сыйлық болды:

- Мен өмір бойы Октябрьскіде тұрамын, бізде бұрын-соңды мұндай жағдай болған емес. Бұрын Алтайға бару керек еді. Ал қазір бәрі көршілес. Осыған бар күш-жігерін, жанын салған жандарға рахмет, - деді толғанып. 

Көпбалалы ана Юлия Бауэр  үйдің жанында медициналық көмек көрсетудің маңыздылығын атап өтті:

- Балалар арасында дәрігердің шұғыл кеңесі қажет болатын жағдайлар жиі кездеседі. Енді алысқа барудың қажеті жоқ. Мұнда таза, жарық, бәрі заманауи. Бізге қамқорлық жасағаны қуантады, - деп бөлісті Юлия. 

Дәрігерлік амбулаторияның ашылуы азаматтардың денсаулығы мен әл-ауқаты басым құндылықтар болып табылатын құқықтық мемлекеттің іргетасын қалаған құжат – ҚР Конституциясының 30 жылдығына арналған іс-шаралардың бір бөлігі болды.