Бұл туралы ШҚО Қылмыстық-атқару жүйесі департаментінің баспасөз қызметінің өкілдері мәлімдеді, деп хабарлайды Buqara.kz сайтының тілшісі.  

Ведомствоның ақпаратынша, ер адам шілде айының ортасында түрмеден босатылып, бас бостандығынан айыру жазасы шектеу жазасына ауыстырылған. Алайда сот шешіміне қарамастан, ол Глубокое аудандық пробация қызметіне барып тіркелмеген.
Осыған байланысты тамыз айының соңында Глубокое аудандық соты оған іздеу жариялады. 
Жақында тәртіп сақшылары оның нақты жүрген жерін анықтап, ұстады. Тұтқындалу кезінде ер адам жалған есім айтып, өзінің кім екенін жасыруға тырысқан. Дегенмен полицейлер мен пробация қызметкерлері оның жеке басын дереу анықтады.
Полиция бөлімінде ол өз кінәсін мойындап, расында іздеуде жүрген азамат екенін растады.
Қазір пробация қызметі сотқа жолдау үшін барлық қажетті материалды жинап жатыр. Енді ол ер адам жазасының өтелмеген бөлігін түзеу мекемесінде өтеуі мүмкін.