Ауданда мүлік иелерінің бірлестіктерін (МИБ) құру бойынша белсенді жұмыс жалғасуда, деп хабарлайды Buqara.kz сайтының тілшісі.

Бүгінде Глубокое және Белоусовка кентінде, Опытное поле ауылында тұрғындар өз үйлерін өздері басқару туралы шешім қабылдап, оң тәжірибе қалыптастырып отыр.

Тұрғындардың айтуынша, басқарудың жаңа нысаны нақты нәтижелерін көрсете бастады: ортақ мүлікті күтіп ұстауға жауапкершілік артты, абаттандыру мәселелері жедел шешілуде, кіре беріс пен үй маңындағы аумақтарда тазалық пен тәртіп сақталуда. Пәтер иелерінің бірлескен жұмысы үйлерге қызмет көрсету сапасын жақсартып, тұрғындардың өмір сүру жайлылығын арттыруға ықпал етуде.

МИБ құру тұрғындарға маңызды шешімдерді қабылдауға қатысуға, қаржының жұмсалуын бақылауға, жөндеу жұмыстарын жоспарлауға және аумақты абаттандыру деңгейін арттыруға мүмкіндік береді.

Дегенмен бірқатар көппәтерлі тұрғын үйде басқару нысаны әлі таңдалмаған, басқарушы компаниялар жоқ. Бұл ортақ мүлікті күтіп ұстау және қызмет көрсету мәселелерін шешуді қиындатады. Осы бағытта тұрғындармен түсіндіру жұмыстары жүргізіліп, әдістемелік және консультациялық көмек көрсетілуде.

Глубокое ауданында МИБ құру жұмыстары алдағы уақытта да жалғасады. Бұл тұрғын үй қызметтерінің сапасын арттыруға, басқару жүйесінің ашықтығын қамтамасыз етуге және халықтың жайлы өмір сүруіне қолайлы жағдай жасауға бағытталған маңызды қадам.