Бүгін кеншілер қаласында Қазақстан халқының бірлігі күніне арналған жарқын да мазмұнды мерекелік шара өтті, деп хабарлайды Buqara.kz сайтының тілшісі.

Ұйымдастырушылар сөзінше, достық пен өзара құрмет рухын сездірген бұл күн қала тұрғындарын ортақ құндылықтар мен мақсаты бір жұрт ретінде тағы да біріктірді.

– Қала халқына арналған концертте жергілікті шығармашылық ұжымдар өнер көрсетіп, түрлі халық әуендері мен билерін ұсынды. Бай мазмұнды бағдарлама елдің басты күші – көпұлттың бірлігі мен татулығы екенін айқын көрсетті. Мереке аясында сәндік-қолданбалы өнер көрмесі ұйымдастырылды, – деді қала әкімдігі өкілдері.

Шеберлер ұлттық нақышқа толы, түрлі мәдениет ерекшелігін танытатын жұмыстарын ұсынып, қонақтардың қызығушылығын оятты. Көрмеге келгендер олардың туындыларды тамашалап, авторлармен тілдесіп, жылы пікірлерімен бөлісті.

– Сонымен бірге «Бірліктің әрбір кадры» атты фотозоналар байқауы өтті. Қатысушылар ерекше, мазмұнды және креативті фотолокациялар әзірлеп, қала тұрғындары мен қонақтары естелік суреттер түсіру мүмкіндігіне ие болды. Фотозоналар балалар мен ересектерге қуаныш сыйлаған көркем бұрыштарға айналды, – делінген мәліметте.

Мереке шырайын келтірген басты сәттердің бірі – қаланың шығармашылық ұжымдары орындаған «достық шеңбері» болды. Бұл композиция түрлі мәдениет пен дәстүрді бір сахнада тоғыстырып, өзара құрмет пен татулықтың айқын белгісін көрсетті.

Мерекелік шара бірлік, келісім және көтеріңкі көңіл күй аясында өтті.

– Риддер тұрғындары тағы да біздің басты байлығымыз – достық пен ортақ құндылықтар екенін дәлелдеп, жарқын болашақты бірге құруға деген дайындықтарын көрсетті, – деді ұйымдастырушылар.