«Бірге жақсылық жасайық» қоғамдық қоры мен еріктілер қозғалысы бастамасымен шаһарда ерекше контейнерлер пайда болды, деп хабарлайды Buqara.kz сайтының тілшісі.

Олар жұп болып орналастырылған. Яғни біреуі киім, аяқ киім және тоқыма бұйымдарын жинауға, екіншісі ұзақ сақтау мерзімі бар азық-түлік өнімдері мен қажетті тауарларды жинауға арналған. Жәшіктер тәулік бойы ашық болады.

- Біздің қорымыз қиын жағдайдағы адамдарға үнемі көмектеседі. Ай сайын жүздеген адам еріктілер қолдауын алады. Мұқтаж адамдарға көбірек қол жеткізіп, қала тұрғындарының қайырымдылыққа қатысуын жеңілдету үшін біз жиырма қайырымдылық контейнерін орнатуды шештік. Қазір Карбышев көшесі, 54 және Дина көтерме сауда базарында бар. Олар жақын арада Заречный және Заря (KShT) базарларына орнатылады. Әкімдік мақұлдауынан кейін біртіндеп қаланың адам жиі жүретін жерлеріне көбірек орнатуды жоспарлап отырмыз, - деді ұйым директоры Татьяна Беркман. 

Жиналған заттар мен азық-түлік күн сайын Гуманитарлық көмек орталығына жеткізіледі, онда олар сұрыпталады. Тиісті заттар тікелей мұқтаж жандарға таратылса, ал қалғандары қайта өңдеуге жіберіледі.

Kazzinc кәсіпорны да әлеуметтік бастаманы қолдады. Бірнеше жыл бұрын компания қор кеңсесін жөндеу, жиһаз және кеңсе жабдықтарының шығындарын да өз мойнына алды.

- Кейде ең қарапайым көмек - жылы киім, азық-түлік немесе қажетті заттар - қиындыққа тап болған отбасы үшін өте маңызды болуы мүмкін. Мұндай сәттерде жалғыз емес екеніңізді сезіну өте маңызды. Біз тіпті кішкентай көмектің өзі қиын жағдайға тап болғандарға сеп бола алатынына сенеміз. Егер әрқайсымыз мейірімділікке қарай қадам жасасақ, әлем әлдеқайда мейірлене түседі, - деді кәсіпорынның әкімшілік істер жөніндегі басқарушы директоры Андрей Лазарев.