Балалардың жолдағы қауіпсіздігін қамтамасыз ету мәселесі өзекті болып қала береді. Балалар – жол қозғалысына қатысушылардың ең осал санаттарының бірі және ересектер тарапынан ерекше назар мен жауапкершілікті талап етеді, деп хабарлайды Buqara.kz сайтының тілшісі KAZINFORM сайтына сілтеме жасап.

Бұл туралы Орталық коммуникациялар қызметі алаңында өткен брифингіде Ішкі істер министрлігі Әкімшілік полиция комитеті төрағасының орынбасары Ғалым Сарғұлов мәлімдеді.
– Жыл сайын жүргізілетін түсіндіру жұмыстарына қарамастан, балалардың қатысуымен болатын жол-көлік оқиғалары мәселесі өзекті күйінде қалып отыр. Өкінішке қарай, өткен жылы жол-көлік оқиғалары салдарынан 285 бала қаза тапты. Бұл – жол беруге болмайтын шығын, - деді спикер.
Оның айтуынша, зардап шеккен кәмелетке толмағандардың жартысынан астамы көлік құралдарының жолаушылары болған. Қалғандары – жаяу жүргіншілер, оның ішінде велосипедшілер, самокат пайдаланушылар және мопед жүргізушілері.
– Көп жағдайда зардап шеккен балалар ересектер тарапынан тасымалдау қағидаларының бұзылуымен, яғни арнайы балалар құрылғыларынсыз немесе қауіпсіздік белдігін тақпай тасымалданған. Жол қозғалысы қауіпсіздігі жүргізушілерге де, жаяу жүргіншілерге де байланысты. Тәуекел екі тарапта да бар, - деді ол.
Сондай-ақ брифинг барысында Ғалым Сарғұлов жол-көлік оқиғаларының себептері ретінде жаяу жүргіншілердің, соның ішінде кәмелетке толмағандардың белгіленбеген жерден немесе тыйым салынған бағдаршам белгісінде жолды кесіп өтуі жиі тіркелетінін атап өтті.
– Балалар кейде жол жағдайын дұрыс бағаламай, бұрылыс немесе тоқтап тұрған көлік артынан көлік кенеттен шығып қалуы мүмкін екенін ескермейді. Қараңғы уақытта жүргізушілерге жаяу жүргіншілерді байқау қиынырақ, әсіресе киімінде жарық шағылыстыратын элементтер болмаған жағдайда. Сондықтан балаларға жолдан өтер алдында жүргізушімен міндетті түрде көзбен байланыс орнатудың және аса мұқият болудың маңыздылығын түсіндіру қажет, - деп толықтырды спикер.