Аталған жиын 18 мамырда 18:00-де Қ.Қайсенов көшесі,40 мекенжайында ұйымдастырылады,  деп хабарлайды Buqara.kz сайтының тілшісі.

Бұл кеште келушілер тарих, мәдениет, дәстүр және шығармашылық әлеміне сапар шертпек. 
Интерактивті ойындар, шеберлік сабақтары, фотоаймақтар және балалар мен ересектерге арналған білім беру бағдарламалары да көпшілікке қолжетімді болады.
«Туған табиғатқа сыйлық» аймағының аясында қатысушылар «Дыбысты тап» интерактивті ойынына қатысады. Ал «Үш қадам» ойынында білімдерін сынайды. «Ұлы даланың алтыны» көрмесі келушілерді ежелгі артефактілермен және өткеннің құпияларымен таныстырады. Қонақтар жұмбақтарды жинау және ежелгі зергерлік бұйымдарды іздеу шеберлік сабақтарынан, «Ежелгі айна құпиялары» турынан және «Неандерталь» тақырыптық фотоаймағымен танысады. 
«Қазақ халқының өмірі мен мәдениеті» бөлімінде ұлттық дәстүрлерге ерекше назар аударылады. Келушілер «Сусын дәстүрлері» деп аталатын дәм тату ойынына қатысып, бетке сурет салу арқылы қазақ өрнектері әлемімен танысады және тақырыптық фото аймақтарда естелік фотосуреттерге түсе алады.
Ұйымдастырушылар қала тұрғындары мен қонақтарын бұл кешті тарих, шығармашылық және мәдени мұра атмосферасында өткізуге, өткен мен қазіргінің жаңа тарауларын ашуға шақырады.