Қалада қоғамдық көлікте жүру ақысы 2027 жылдың басынан көтерілуі мүмкін. Ұсынысқа сәйкес, жолақы қолма-қол төлем кезінде 200 теңге, ал қолма-қол ақшасыз есеп айырысқанда 120 теңге болады, деп хабарлайды Buqara.kz сайтының тілшісі.

Қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі мәліметінше, тарифті көтеруге жолаушылар тасымалына жұмсалатын шығындардың көбеюі негіз болды.
Атап айтқанда, жанар-жағармай, қосалқы бөлшектер мен шиналардың бағасы өскен. Сондай-ақ автобустарға техникалық қызмет көрсету, жөндеу, сақтандыру мен коммуналдық қызметтерге кететін шығын да көбейді. Бұдан бөлек, кадр тапшылығына байланысты тасымалдаушы компаниялар қызметкерлердің жалақысын көтеруге мәжбүр. Жаңа автобустарды сатып алу да қымбаттады.
– Төлемнің екі түріне бөлек тариф белгілеу жолаушыларды қолма-қол ақшасыз есеп айырысып, жолақыны автоматтаныдырылған жүйе арқылы төлеуге шақыруға бағытталған, – деді ТҮКШ және жолаушылар көлігі және автомобиль жолдары бөліміндегілер.
Қазір тарифті көтеру туралы қаулы жобасы уәкілетті органдармен келісіліп жатыр. Демек ұсынылған тарифтер әзірге түпкілікті бекітілген жоқ.