Google Gmail-дің қауіпсіздік тетіктері берік әрі тиімді бола түскенін айтты, деп хабарлайды Buqara.kz сайтының тілшісі KAZINFORM сайтына сілтеме жасап.

- Жақында біз Gmail пайдаланушыларына қауіпсіздік саласында үлкен проблема бары туралы ескерту бердік деген жалған ақпарат тарады. Бұл мүлде шындыққа жанаспайды, - деді Google 1 қыркүйекте.

Компания фишерлер үнемі компанияның электронды поштасын бұзу жолдарын іздегенімен, ондағы жүйелер фишинг пен зиянды бағдарлама әрекеттерінің 99,9%-дан астамын блоктауға қауқарлы екенін түсіндірді.

- Қосымша қорғаудың ең үздік тәжірибесі ретінде пайдаланушыларға рұқсат кілттері сияқты сенімді құпия сөз баламасын пайдалануды және фишингтік шабуылдарды анықтау және хабарлау үшін осы ұсыныстарды орындауды ұсынамыз, - деп қосты компания.

Айта кетейік, ҚР Бас прокуратурасы Құқықтық статистика және арнайы есепке алу комитетінің Қылмыстық қатерлерді және қоғамдық қауіпсіздік тәуекелдерін болжау орталығы ғаламдық интернет кеңістігіне мониторинг жүргізу барысында Google деректер базасын бұзуға байланысты киберқауіпті анықтаған болатын. Бас прокуратураның хабарлауынша, ұйымдастырушы ShinyHunters тобы құпия сөздер тікелей ұрланбағанымен, 2,5 миллиард Gmail тіркемесін қамтитын байланыс ақпараты мен компания атауларына қол жеткізген.