Биыл өңірде жіті респираторлық вирустық инфекцияның 5419 жағдайы тіркелді, деп хабарлайды Buqara.kz сайтының тілшісі.

Бұл өткен жылмен салыстырғанда 35,6 %-ға аз. Облыстық Санитариялық-эпидемиологиялық бақылау департаменті басшысының орынбасары Сәуле Слямғазинаның сөзінше, былтыр 8350 жағдай тіркелген.
– 14 жасқа дейінгі балалар арасында 3010 жағдай тіркелді. Өткен жылы бұл көрсеткіш 5096 жағдай болған. Соның ішінде бір жасқа дейінгі балалар арасында 89 жағдай анықталды. Жүкті әйелдер арасында ЖРВИ-дің 28 жағдайы тіркелді. Облыс ауруханаларына ЖРВИ диагнозымен 17 адам жатқызылды. Олардың үшеуі – бір жасқа дейінгі балалар. Пневмония диагнозымен 12 адам ауруханаға түсті. Оның ішінде 14 жасқа дейінгі 10 бала, соның ішінде бір жасқа дейінгі екі бала бар, – деді ол. 
Белгілі болғандай, басқа респираторлық вирустарды анықтау мақсатында барлығы 26 сынама зерттелді. Оның алтауынан вирустар анықталды. Атап айтқанда:
- риновирус – 3 жағдай;
- маусымдық коронавирус (hCoV) – 2 жағдай;
- аденовирус – 1 жағдай.
Мамандар тұрғындарға жедел респираторлық инфекциялардың алдын алу шараларын сақтауды, қолды жиі жууды, бөлмелерді тұрақты желдетіп, ауру белгілері байқалған жағдайда дәрігерге уақтылы жүгінуді ұсынады.