Қазақстан шаруашылықтары қысқы кезеңге 42 млн тоннадан астам мал азығын дайындады. Пішен мен сүрлем қоры жоспардан асып, алдағы қыста мал шаруашылығын азықпен қамтамасыз етуге негіз қаланды. Бұл туралы АШМ мәлім етті, деп хабарлайды Buqara.kz сайтының тілшісі KAZINFORM сайтына сілтеме жасап.

Облыс әкімдіктерінің мәліметтеріне сәйкес, ауыл шаруашылығы тауарын өндірушілер мал азығының барлық түрінен 42 млн тоннадан астам қор дайындалған.

Атап айтқанда, 26,9 млн тонна пішен дайындалды. Бұл жоспардың 104,8%-ын құрайды. Сонымен қатар 2,3 млн тонна пішендеме (жоспардың 99,4%-ы), 2,9 млн тонна сүрлем (101,8%), 4,9 млн тонна сабан (103,4%) және 5,5 млн тонна құнарландырылған мал азығы (95,8%) әзірленді.

— Мал азығының негізгі түрлері бойынша жоспарлы көрсеткіштердің артығымен орындалуы қосымша қор қалыптастыруға және алдағы қысқы кезеңде қолайсыз ауа райы жағдайларының ықтимал әсеріне мал шаруашылығы кәсіпорындарының төтеп беруіне жол ашады, — делінген хабарламада.

Бұдан бөлек, шаруашылықтарда өткен қыстатудан қалған 3,6 млн тонна мал азығы бар. Бұл қор да мал шаруашылығының қажеттіліктерін қамтамасыз етуге жұмсалады.

Ауыл шаруашылығы тауарын өндірушілерді мал азығы ресурстарымен қосымша қамтамасыз ету мақсатында «Азық-түлік келісімшарт корпорациясы» акционерлік қоғамы алдағы қысқы кезеңге арнап жемдік астық қорын қалыптастырады. Қажет болған жағдайда ол резервтік ресурс ретінде пайдаланылады.

Ауыл шаруашылығы министрлігі өңірлердің әкімдіктерімен бірлесіп, мал азығын дайындау науқанының қорытынды кезеңіне мониторинг жүргізуді жалғастыруда.

Атқарылып жатқан жұмыстар қажетті мал азығы қорын уақытылы қалыптастыруға, мал шаруашылығы кәсіпорындарын жеткілікті азықтық базамен қамтамасыз етуге және алдағы қыс мезгілінде қорада ұстау кезеңін тұрақты өткізуге бағытталған.