Республика күніне орай Алтай ауданында керлингтен Шығыс Қазақстан облысы чемпионатының ашылу салтанаты өтті, деп хабарлайды Buqara.kz сайтының тілшісі.

Жарыс ШҚО Дене шынықтыру және спорт басқармасына қарасты Алтай қаласының балалар-жасөспірімдер спорт мектебінің хоккей модулінде ұйымдастырылды.

Чемпионатқа 2007 жылы туған және одан кіші жасөспірімдер, ерлер мен әйелдер, аралас командалар және аралас жұптар қатысады.

Жарыстың мақсаты – өңірде керлинг спортын дамыту, спортшылардың шеберлігін арттыру және салауатты өмір салтын насихаттау.

Республика күніне орай ұйымдастырылған спорттық іс-шара өңірдегі бұқаралық спортты дамытуға, спортшылар арасындағы ынтымақтастықты нығайтуға және тұрғындардың дене шынықтыруға деген қызығушылығын арттыруға ықпал етеді.