Өңір басшысы Нұрымбет Сақтағанов «Қазақ газеттері» ЖШС бас директоры Ержан Байтілеспен кездесті, деп хабарлайды Buqara.kz сайтының тілшісі ШҚО әкімінің баспасөз қызметіне сілтеме жасап. 

Онда отандық баспасөздің бүгінгі жағдайы, басылымдардың қоғамдағы рөлі және ақпарат саласындағы өзара әріптестік мәселелері сөз болды. 

«Қазақ газеттері» - еліміздің ақпарат кеңістігінде өзіндік орны бар ірі медиа құрылымдардың бірі. Серіктестік құрамына «Егемен Қазақстан», «Казахстанская правда», «Ана тілі», «Ақиқат», «Мысль», «Уйғур авази», «Ұлан», «Ақ желкен», «Балдырған» және «Дружные ребята» газеттері мен журналдары кіреді. Әр басылымның өзіндік бағыты мен оқырманы бар. Олар қоғамдық-саяси өмірден бастап, ұлттық құндылықтар, мәдениет, әдебиет, білім мен тәрбие тақырыптарына дейінгі маңызды мәселелерді қамтиды.

️Кездесу барысында облыс әкімі дәстүрлі баспасөздің қоғам үшін маңызына тоқталып, журналистиканың жауапкершілігі мен ақпараттың сапасына қатысты пікір білдірді.

- Қоғам өзгерген сайын ақпарат тарату тәсілдері де жаңарып келеді. Дегенмен, қандай технология дамыса да, журналистиканың басты міндеті өзгермеуі керек. Ол - шынайы ақпарат тарату, елдің тыныс-тіршілігін көрсету, қоғамдағы өзекті мәселелерді көтеру. Газет-журналдар - жай ғана ақпарат құралы емес, ұлттың рухани жадын қалыптастыратын, ана тіліміз бен ұлттық құндылықтарымызды дәріптейтін маңызды институт. Сондықтан дәстүрлі баспасөздің беделін сақтау және оның сапасын арттыру - баршамызға ортақ міндет, - деді Нұрымбет Сақтағанов.

Өңір басшысы Шығыс Қазақстанның әлеуметтік-экономикалық дамуы, мәдениеті мен қоғамдық өміріндегі жаңалықтарды кеңінен насихаттауда республикалық басылымдармен байланыстың маңызын да тілге тиек етті.

Өз кезегінде Ержан Байтілес басылымдардың қазіргі жұмыс бағыттары мен алдағы жоспарлары туралы айтып, өңірлермен ақпараттық әріптестікті дамыту мәселелеріне тоқталды.