Ауданда биыл бірнеше маңызды жоба аяқталады, деп хабарлайды Buqara.kz сайтының тілшісі.

Катонқарағай ауылында жалпы құны  921,6 млн теңгені құрайтын дене шынықтыру-сауықтыру кешенінің құрылысы мәресіне жетті. 

- Бұған дейінгі мердігер компаниямен келісімшарт бұзылып, жобаның сметалық құнын арттырмай, құрылыс жұмыстары «СтройДомСервис» ЖШС-ға тапсырылды. Бүгінде негізгі құрылыс-монтаж жұмыстары толық аяқталды. Нысанның ашылуы 24 қазанға жоспарланып отыр, - деді аудан басшысы Данияр Дүйсембаев.

Сондай-ақ осы жылы Топқайың ауылындағы су құбыры желілері мен құрылыстарын реконструкциялау аяқталды. Жобаны 2021 жылы маусымда «QazConstructions» ЖШС қолға алған еді. Оның жалпы құны - 602,865 млн теңге. Нысанды толық аяқтау мақсатында сметалық құнды ұлғайтпай, «SELuX» ЖШС-мен 77,779 млн теңгеге қосымша келісімшарт жасалды.