Шығыс Қазақстан облысы ұзақ уақыт бойы өнеркәсіптік аймақ ретінде қабылданды, деп хабарлайды  Buqara.kz сайтының тілшісі.

Дегенмен аймақтың туристік әлеуеті айтарлықтай дамып, біртіндеп туристердің назарын аудара бастады.
Мұнда Бұқтырма су қоймасының жағалауы, Самар құмдары және Сібе көлдері сияқты көркем жерлер көп. Әсіресе биік таулары, әсем табиғаты және бай мәдени мұрасы бар Катонқарағай ауданы ерекше қызығушылық тудырады.
Өңірдің туристік имиджін насихаттау жұмыстарының бірі 2025 жылдың жазында Катонқарағайда өтті. Ауданда елдің түкпір-түкпірінен жиналған қауымды өзіне қаратқан «Алтай – түркі әлемінің алтын бесігі» атты ауқымды фестиваль ұйымдастырылды. Іс-шараға он мыңға жуық адам жиналып, мәдени, спорттық және ғылыми жиындар өткізілді. 
Фестиваль бағдарламасына ұлттық спорт түрлерінен – көкпар, бәйге, аударыспақ және жамбы ату жарыстары кірді. Берел мұражайы мен археологиялық кешенде поэзия кеші, ақындар айтысы және түркітанушылардың ғылыми-практикалық конференциясы да ұйымдастырылды.
Фестиваль 11 түркі елінің өнерпаздарының басқосуымен өткен гала-концертпен аяқталды. Облыс аудандары өз киіз үйлерін құрып, кәсіпкерлер жәрмеңке мен ұлттық тағамдарды ұсынатын фуд-корт ұйымдастырды.
Ұйымдастырушылар фестивальді жыл сайын өткізуді жоспарлап отыр. Мұндай іс-шаралар өңірдің туристік тартымдылығын арттыруға және аймаққа туристерді  тартуға көмектеседі деп күтілуде.