Қазіргі таңда облыстың барлық ауданында егіс науқаны қарқынды жүргізілуде. Өңір шаруалары отандық және шетелдік селекцияның сапалы тұқымдық материалымен толық қамтамасыз етілген, деп хабарлайды Buqara.kz сайтының тілшісі.

Тұқымға деген қажеттіліктің 30 пайыздан астамы облыстағы тұқым шаруашылықтары есебінен өтеледі. Бүгінде аймақта осындай 16 кәсіпорын жұмыс істейді, оның 7-еуі элиталық тұқым шаруашылығы мәртебесіне ие.

Жергілікті тұқым өндірушілер жыл сайын шамамен 25 мың тонна тұқымдық материал өндіреді. Сонымен қатар тұқым шаруашылықтары ауыл шаруашылығы дақылдарының жаңа жоғары өнімді сұрыптарын шығару бағытында селекциялық жұмыстарды белсенді түрде жүргізіп келеді.

Облыстағы жетекші элиталық тұқым шаруашылықтарының бірі – «Майлы дақылдардың тәжірибелік шаруашылығы» ЖШС. Биыл кәсіпорынның маңызды жетістіктерінің бірі – «Атамекен» соя сұрыпының Ресей Федерациясы Мемлекеттік тізілімінің Батыс Сібір өңірінде аудандастырылуы болды. Аталған сұрып Сібір федералдық округінде, оның ішінде Омбы, Новосібір және Кемерово облыстарында, сондай-ақ Алтай өлкесінде өсіруге рұқсат етілді.

Ресейдің мемлекеттік сұрып сынақтарының нәтижесі бойынша «Атамекен» сұрыпы жоғары өнімділігін көрсетіп, гектарына 40–44 центнер деңгейінде өнім берді. Биылдан бастап кәсіпорын аталған Ресей өңірлеріне тұқымдық материал жеткізуді жоспарлап отыр.

Мемлекет басшысы Касым-Жомарт Токаев Қазақстанның ауыл шаруашылығындағы ғылымды дамыту жөнінде бірнеше рет нақты тапсырмалар берген. Атап айтқанда, ауыл шаруашылығы дақылдарының жаңа сұрыптарын шығару саласындағы аграрлық ғылымды дамыту міндетін қойды. Президенттің: «Ғылым белсенді жұмыс істеген жерде нәтиже де болады» деген сөзі осы бағыттың маңызын айқындай түседі.