Қазақстанда 2026 жылдың бірінші жартыжылдығының қорытындысы бойынша халық денсаулығының бірқатар негізгі көрсеткіштері жақсарды. Бұл туралы ҚР Денсаулық сақтау министрлігінің алқа отырысында ҚР Денсаулық сақтау бірінші вице-министрі Тимур Сұлтанғазиев мәлімдеді, деп хабарлайды Buqara.kz сайтының тілшісі KAZINFORM сайтына сілтеме жасап.

Ведомствоның мәліметінше, жалпы өлім 0,8%, қанайналым жүйесі ауруларынан болатын өлім 10,9%, онкологиялық аурулардан болатын өлім 5%, жол-көлік оқиғалары салдарынан болатын өлім 20,9% төмендеді. Жеті айда ана өлімі 17,5% азайды.

Жеті айдың қорытындысы бойынша ана өлімі көрсеткіші 100 мың тірі туған балаға шаққанда 9,7-ден 8,0-ге дейін төмендеді.

— Нәресте өлімі 5,93 болды, жоспарлы көрсеткіш — 7,3. Неонаталдық өлім 3,05 болды, жоспар — 4,1. Екінші жартыжылдықта негізгі назар жүктілік асқынуларының алдын алуға, әйелдер мен балаларды медициналық бақылау сапасына, патронажға және медициналық көмекті уақтылы көрсетуге аударылады, — делінген хабарламада.

МСАК ұйымдарына профилактикалық мақсатта келу үлесі 33,7%-ға, жылдық жоспар — 27%-ға жетті.

Онкологиялық скринингтермен қамту 37,6%-дан 42%-ға дейін өсті. Қатерлі ісіктердің ең ерте — 0–I сатыларында анықталу үлесі 34,3%-ды құрады, жоспарлы көрсеткіш — 33,8%.

Сонымен қатар Министрлік ауруларды ерте анықтау көрсеткіштері төмен болып отырған және пациенттерді медициналық ұйымдардың арасында маршрутизациялау мәселелері бар өңірлердегі жұмысты күшейтуді жоспарлап отыр.