Өңірде тыйым салынған заттарды тергеу изоляторы мен қауіпсіздігі барынша жоғары мекемеге өткізу әрекеті анықталды, деп хабарлайды Buqara.kz сайтының тілшісі. 

ШҚО бойынша қылмыстық атқару жүйесінің баспасөз қызметі өкілдерінің мәліметінше, Өскемендегі тергеу изоляторының қызметкерлері сәлемдеме жеткізу бөлмесінен шай қорабына салынған ұялы телефон мен құрамында алкоголь бар газдалған сусынды тәркіледі. Қазір ол сараптамаға жіберілді. 
Ал қауіпсіздігі барынша жоғары мекеме аумағында жабысқақ таспамен оралған төрт пакеті бар ер адам ұсталды. Сәлемдемені ашқанда көп мөлшердегі тағамдық көкнәр мен тропикамид табылды. Ер адам оны жазасын өтеп жатқан досына бермекші болғанын айтты. 
Екі факті бойынша ҚР ӘҚБтК-нің 481-бабына сәйкес әкімшілік хаттама толтырылып, құқық бұзушылар жауапкершілікке тартылды.