«Еңбек ресурстарын дамыту орталығы» АҚ Болжау және зерттеу департаментінің сарапшылары туу, өлім және көші-қон көрсеткіштері негізінде демографиялық болжам дайындады, деп хабарлайды Buqara.kz сайтының тілшісі, BAQ.KZ сайтына сілтеме жасап.

Талдауға сәйкес, 2030 жылға қарай Қазақстанның қала халқының саны 13% - ға артып, 14 млн адамға жетеді, ал 2050 жылға қарай 57% - ға өсіп, 19,3 миллионды құрайды. Сонымен бірге, 2030 жылға қарай ауыл халқының саны тек 1%-ға, 7,7 млн адамға дейін, ал 2050 жылға қарай-шамамен 9%-ға, 8,2 млн адамға дейін өседі.

Болжам бойынша, қала халқының саны 2030 жылға қарай базалық сценарий кезінде Астана қаласында – 538,3 мың адамға немесе 39%-ға, 1,9 млн адамға дейін, Алматы қаласында – 469,3 мың адамға немесе 21% - ға, 2 млн 664 мың адамға дейін, Шымкент қаласында –209,6 мың адамға немесе 17% - ға өседі, нәтижесінде 1 млн 416 мың адамға жетеді. 

Бұдан басқа, өңірлік бөліністе қала халқы Маңғыстау облысында 79,2 мың адамға, Ақтөбе облысында 70,3 мың адамға, Түркістанда 62,4 мың адамға өседі. Бұл ретте Шығыс Қазақстан, Солтүстік Қазақстан және Павлодар облыстарында қала халқының саны азаюы мүмкін.

Ал 2050 жылға қарай қала тұрғындары санының азаюы Павлодар, Шығыс Қазақстан және Солтүстік Қазақстан облыстарында болжанады, тиісінше 7%, 6% және 5% - ға қысқарады.