Шығыс Қазақстан облысында есепте тұрған кәмелетке толмаған жасөспірімдердің басым бөлігі толық емес отбасылардан шыққан. Бұл туралы ШҚО Полиция департаменті Жергілікті полиция қызметі басқармасы бастығының міндетін атқарушы, полиция полковнигі Орал Рыспаев мәлімдеді, деп хабарлайды Buqara.kz сайтының тілшісі

Оның айтуынша, «Жасөспірім» жедел алдын алу шарасы басталғалы бері өңір аумағында 27 кәмелетке толмаған бала арнайы есепке алынған. Тағы бір айта кетерлігі – бұл балалардың барлығы да отбасыларымен бірге ішкі істер органдарының бақылауында тұр.

Жалпы іс-шара аясында құқық қорғау органдары тарапынан 473 жасөспірім ішкі істер бөлімдеріне жеткізілген. Сонымен қатар облыс бойынша 479 әкімшілік құқық бұзушылық фактісі тіркеліп отыр. Бұл көрсеткіштер жасөспірімдер арасындағы құқық бұзушылықтың әлі де өзекті мәселе екенін көрсетеді.

– Кәмелеттік жасқа толмаған балалар көбіне ата-ананың іс-әрекетінен үлгі алады. Егер үйдегі ересектер олардың көзінше ішімдік ішіп, жанжал шығарып, ұрыс-керіс туындататын болса, мұндай жағдайлар бала психологиясына кері әсер етеді. Нәтижесінде олар теріс жолға түсіп, зиянды әдеттерді бойына сіңіріп алады. Сондықтан отбасындағы тәрбие – ең басты мәселе, – деді Орал Рыспаев.

Сонымен қатар, полиция өкілі биылғы жылдың басынан бері өңірде 10 кәмелетке толмаған баланың үйінен қашып кеткенін атап өтті. Мұндай деректер жасөспірімдердің қауіпсіздігі мен олардың әлеуметтік жағдайының назардан тыс қалмауы қажеттігін тағы бір мәрте көрсетіп отыр.

- Балалар арасындағы құқық бұзушылықтың алдын алу тек полицияның ғана емес, ата-аналардың, білім беру мекемелерінің және қоғамның бірлескен жұмысы нәтижесінде жүзеге асады. Сол себепті бұл мәселе бойынша барлық мүдделі тараптардың өзара әрекеті ерекше маңызды болып отыр, - деді Орал Рыспаев.