Шығыс Қазақстан облысының әкімі Нұрымбет Сақтағановтың жетекшілігімен облыс делегациясы 20 мамырда ҚХР Синьцзян-Ұйғыр автономиялық ауданының Алтай қаласында өтетін «Үлкен Алтай» өңірлік ынтымақтастық жөніндегі халықаралық конференцияға қатысады, деп хабарлайды Buqara.kz сайтының тілшісі.

Делегация құрамында облыстық басқарма өкілдері, аудан әкімдері, сондай-ақ бизнес саласының өкілдері бар.

ШҚО делегациясы конференция аясында сауда және экономика, білім, ғылым және техника, ауыл шаруашылығы мен экология, мәдениет, туризм және спорт, сондай-ақ өткізу бекеттерін дамыту бойынша сессияларға қатысады.

Іссапар барысында ШҚО әкімі СҰАА партия комитетінің хатшысымен және Синьцзян-Ұйғыр автономиялық ауданы халық үкіметінің төрағасымен ресми кездесу өткізеді.

Бағдарламаға сәйкес ШҚО делегациясы Алтай политехникалық колледжіне, табиғи төмен дейтерийлі мұздық суын өндіретін «Синьцзян Сюэду» компаниясына және Алтай аймақтық дәстүрлі қытай медицинасы ауруханасына барады.

Кездесулер барысында түрлі бағыттар мен салалар бойынша ынтымақтастықтың жаңа мүмкіндіктерін қарастыру жоспарлануда.