22 мамыр күні Шығыс Қазақстан облыстық Балалар және жасөспірімдер кітапханасында Халықаралық балаларды қорғау күніне орай ұйымдастырылған «Отбасында өмір сүру бақыты» республикалық іс-шаралар жоспары аясында «Шаңырақ шуағы» атты мерекелік мәдени шара өтті, деп хабарлайды Buqara.kz сайтының тілшісі. 

Бұл тағылымы терең, мазмұны мәнді шара отбасылық құндылықтарды дәріптеп, кітап оқудың маңыздылығын насихаттауға бағытталды.

– Осы арқылы біз, ең алдымен, отбасы құндылықтарын дәріптеп, кітап оқудың рухани маңызын жұртшылыққа жеткізуді мақсат еттік. Қазақ халқы үшін отбасы – тәрбие мен ізгіліктің алтын ұясы. Ал сол ұядағы сыйластық пен мейірімге баулу – ұлттың ертеңін ойлаған жанның басты борышы. Өскелең ұрпаққа осы құндылықтарды сіңіру – болашаққа бастар баянды жол деп білемін, – деді кітапхананың коммуникация орталығының жетекшісі Эльмира Сейтқазықызы.

Шара аясында «Чудо-детки» дамыту студиясының психолог маманы балалар мен ата-аналарға арнап арнайы кездесу өткізді. Жылы жүздесу барысында тәрбие берудің өзекті мәселелері, отбасындағы эмоционалды жақындықтың маңызы және ата-ана мен бала арасындағы тиімді қарым-қатынас орнату жолдары кеңінен талқыланды.

Ізгілік пен мейірімге, рухани дамуға жол ашқан бұл мерекелік шара қатысушылардың жүрегінен орын тауып, отбасылық бірліктің қадірін тереңірек ұғынуға себеп болды.