ШҚО Білім басқармасы баспасөз қызметінің мәліметінше, Мемлекет басшысының тапсырмасымен білім беру инфрақұрылымын жаңғыртуға бағытталған «Келешек мектебі» ұлттық жобасы аясында өңірде 3 мың оқушы орнына арналған 7 заманауи білім ордасының құрылысы жоспарланған, деп хабарлайды Buqara.kz сайтының тілшісі.

Бүгінгі таңда Шемонаиха, Риддер, Өскемен қалаларында және Глубокое ауданына қарасты Белоусовка кентінде 5 мектеп пайдалануға берілді.

Оның ішінде Шемонаихадағы Шәкәрім атындағы №4 жалпы білім беретін мектеб мен Риддердегі №12 жалпы білім беретін мектебі апатты жағдайдағы мектептердің орнына салынып, 1 сәуірде іске қосылды. 

Өскемендегі №31 жалпы білім беретін мектебі, №40 жалпы білім беретін мектебі мен Глубокое ауданындағы №2 Белоусовка жалпы білім беретін мектебінде білім беру қызметіне лицензия алу үшін қажетті құжаттар әзірленіп, тиісті рәсімдер жүргізіліп жатыр.

Сонымен қатар аймақта тағы екі мектептің құрылысы жалғасуда. Олар: Глубокое ауданындағы №2 Опытное поле жалпы білім беретін мектебі және Өскемендегі №41 жалпы білім беретін мектеп (Есенберлин көшесі).

Осылайша, «Келешек мектебі» ұлттық жобасы заман талабына сай, қауіпсіз әрі жайлы білім беру ортасын қалыптастыруға бағытталған. Бұл өңірдегі білім сапасын арттыруға елеулі үлес қосады.