Бұл туралы бүгін Өңірлік коммуникациялар қызметі алаңында өткен брифингте белгілі болды, деп хабарлайды Buqara.kz сайтының тілшісі.

Аудан әкімі Ренат Құрмамбаевтің сөзінше, 2024–2028 жылдар аралығында 49,6 млрд теңге инвестиция тарту арқылы 7 жобаны жүзеге асыру жоспарланып отыр.
- Ауданның экономикасын әртараптандыру мақсатында қолда бар әлеует толықтай сараланып, тиімді географиялық орналасуы, энергетикалық және табиғи ресурстардың қолжетімділігі ескеріліп, экономикалық өсудің басты нүктелері айқындалды, - деді ол. 
Белгілі болғандай, жыл басынан бері өндіріс көлемі 7,8%-ға (12 млрд 719 млн теңге), ауыл шаруашылығы өнімінің көлемі 118,5%-ға (2 млрд 756 млн теңге), бөлшек тауар айналымының көлемі 109,2%-ға (14 млрд 828 млн теңге) артты. 
- Мемлекет басшысы өз Жолдауында агроөнеркәсіптік кешенге инвестиция тартудың маңыздылығына ерекше тоқталды. Алтай ауданы ауыл шаруашылығы саласында серпінді даму әлеуетіне ие. Бүгінгі таңда бес тауарлы-сүт фермасы жұмыс істейді. Сиыр басы 6306-ға жетіп, өндірілген сүт көлемі 2915,1 тоннаны құрап отыр. Бұл көрсеткіш – ауданның азық-түлік қауіпсіздігін қамтамасыз ету жолындағы нақты қадамдардың айғағы, - дейді Ренат Құрмамбаев. 
1 мамырдағы жағдай бойынша ауданда 3445 шағын және орта кәсіпкерлік субъектісі тіркелген. Онда 9,5 мың адам еңбек етіп, экономикалық белсенді халықтың 28%-ын құрап отыр. Ал өндірілген өнім мен көрсетілген қызмет көлемі 10,9 млрд теңгеге жетті.

Ұлжан СЕЙІТХАНОВА