"Shygys Aibyn-2025" облыстық жарысының жеңімпаздары халықаралық байқауға қарқынды дайындық үстінде, деп хабарлайды Buqara.kz сайтының тілшісі.

Естеріңізге сала кетейік, Өскемен гарнизонындағы 27943 әскери бөлімнің аумағында өткен "Shygys Aibyn-2025" облыстық әскери-патриоттық жарысында Алтай қаласындағы С.Нұрмағамбетов атындағы мектептің оқушылары жүлделі орын иеленіп, облыс намысын халықаралық деңгейде қорғау мәртебесіне ие болды.

Қазір алтайлық жас сарбаздар Ақтөбеде ұйымдастырылатын республикалық "AIBYN-2025" байқауына дайындалып жатыр. 

– Біз күн сайын саптық дайындық, спорттық жаттығулар мен алғашқы көмек көрсету сабақтарына қатысып жатырмыз. Әрқайсымыз өз міндетімізді жауапкершілікпен орындауға тырысамыз. Алдағы жарыста үздік нәтиже көрсету – басты мақсатымыз, – дейді 8 сынып оқушысы Рыспек Әлімхан.

Жаттығу барысында оқушылар саптық даярлық, әскери-қолданбалы спорт түрлері, алғашқы медициналық көмек көрсету және тактикалық іс-қимылдар бойынша шыңдалуда. 

– Балаларда нағыз жауынгерлік рух бар. Командалық ауызбіршілік пен тәртіпті сақтай отырып, олар үлкен байқауға сенімді дайындалуда. Оқушылардың ынтасы жоғары, – дейді “Жас Сарбаз” балалар мен жасөспірімдер әскери-патриоттық қозғалысының ШҚО филиалы Республикалық қоғамдық төрағасы Дәурен Шоматов.

Жарысқа қатысуға Қазақстаннан бөлек 11 мемлекеттен өтінім берілді. 

Шығысқазақстандықтар 19 маусымда жолға шығады.