Қазақстан Республикасы Конституциясы күні қарсаңында Өскемен қаласындағы Халыққа қызмет көрсету орталықтарында 16 жасқа толған азаматтарға алғашқы жеке куәліктерін салтанатты түрде табыстау рәсімдері өтті, деп хабарлайды Buqara.kz сайтының тілшісі. 

Іс-шаралар республикалық #ATAZAN_AZAMAT_KZ челленджі аясында ұйымдастырылды. Жас азаматтарға алғашқы құжаттары салтанатты жағдайда естелік сыйлықтармен бірге табысталды.

«Челлендж маңызды мемлекеттік мереке – Конституция күніне орайластырылып, әрбір азаматтың құқықтық мемлекет қалыптастырудағы рөлін айшықтауға бағытталған. Атап айтқанда, азаматтық құқыққа енді ғана ие болып жатқан жастарға ерекше көңіл бөлінуде. Алғашқы жеке куәліктің табысталуы олардың құқықтық мәртебесін ресми мойындаудың және қоғам өміріне белсенді араласуының белгісі болып табылады», – деп атап өтті «Азаматтарға арналған үкімет» ШҚО бойынша филиалы.

#ATAZAN_AZAMAT_KZ челленджі аясындағы осындай шаралар республика көлемінде өтіп, өсіп келе жатқан жас ұрпаққа патриоттық тәрбие берудің бір бөлігіне айналмақ.

Еске сала кетейік, 16 жасқа толған азамат жеке куәлік алу үшін ата-анасымен немесе заңды өкілімен бірге кез келген ХҚКО-ға барып, туу туралы куәлігін, ата-анасының жеке куәлігін ұсынып, мемлекеттік баж салығын (0,2 АЕК) төлеуі қажет.