Бүгін ҚР Конституция күні мен Шахтерлер күніне орай облыс әкімдігінде тау-кен саласының ардагерлері мен қызметкерлерін марапаттау салтанаты өтті, деп хабарлайды Buqara.kz сайтының тілшісі.

Аймақ басшысы Нұрымбет Сақтағанов сала мамандарын кәсіби мерекемен құттықтап, ізгі тілегін білдірді. 
- Бүгін ҚР Конституциясының 30 жылдығының қарсаңында мемлекетіміздің нығаюына үлес қосып жүрген бірқатар маман иесін құрмет тұтып, марапаттап жатырмыз. Ата Заң - егемендігіміздің негізі, азаматтардың құқығы мен бостандығының кепілі, қоғамдағы бірлік пен тұрақтылықтың белгісі. Бүгінде Шығыс Қазақстанның ел дамуына қосып отырған зор үлесімен мақтанамыз. Біздің өңір - мемлекеттің негізгі индустриялық, ғылыми, мәдени орталықтарының бірі. Осы ретте шахтерлер мен кеншілер, құрылысшылар, жеңіл және ауыр өнеркәсіп мамандарына құрмет көрсету орынды. Сіздердің еңбектеріңіз әрқашан батылдық пен жауапкершілікті талап етеді. Күн сайын жер астына түсіп, аймақ энергетикасы мен металлургиясының өркендеуіне атсалысып жүрсіздер. Осындай мерейлі сәтте сіздерге мықты денсаулық, отбасыларыңызға амандық, еңбектеріңізге табыс тілеймін! - деді облыс әкімі. 
Салтанатты жиын барысында бірқатар азаматқа ІІІ дәрежелі “Еңбек даңқы” ордені, “Ерен еңбегі үшін” медалі және Өнеркәсіп және құрылыс министрлігінің Алғыс хаты табыс етілді. 
“Казцинк” ЖШС Риддер-Сокольный кенішінің өндіру жұмыстарының жерасты тау-кен учаскесінің өткізгіші Мирас Нұртазиннің айтуынша, мұндай марапат күтпеген тосынсый болды. 
- Бүгін алғаш рет аймақ басшысының қолынан “Ерен еңбегі үшін” медалін алдым. Мен үшін - бұл зор мәртебе. Қобалжып тұрғаным да рас. Еңбегімді елеп жатқанына алғыс айтамын. Барлық әріптес-шахтерлерге зор денсаулық пен мол жақсылық тілеймін, - деді ол. 
Ал Өнеркәсіп және құрылыс министрлігінің Алғыс хатына ие болған “Альприма” ЖШС тігін цехының шебері Юлия Чернышева Жұмысшы мамандықтары жылында көрсетілген құрмет үшін қуанышты екенін жеткізді.     
- Биыл тігінші болып жұмыс істегеніме 30 жыл толады. Біраз жыл бұрын осы мамандық өз имиджін жоғалтып алған еді. Бүгінде бұл кәсіптің маңызы қайтадан артып келеді. Бұл - қуантарлық жәйт. Кәсіби мереке қарсаңында марапатталып та жатырмын, дәл қазір толқып тұрмын. Әріптестерімді де шын жүректен құттықтаймын, - деді Юлия Чернышева.

Қымбат МУХАМАДИЕВА 
Фотосурет автордікі