Құрметті достар!

Президенттің Жолдауында айтылған «Қазақстан алдағы 3 жылда цифрлық мемлекетке айналуы тиіс» деген міндет – ел дамуының жаңа кезеңіне жол ашатын тарихи бетбұрыс. Бұл жай ғана технологиялық серпіліс емес, бұл – қоғамның барлық саласына әсер ететін кешенді өзгеріс.

Цифрландыру бүгінде біздің өміріміздің ажырамас бөлігіне айналды. Мемлекеттік қызметтер онлайн форматқа көшті, қағазбастылық азайды, ал жаңа жүйелердің арқасында миллиардтаған теңге көлеңкеден шығарылып, ел игілігіне жұмыс істей бастады. Бұл – нақты нәтиже.

Президенттің жасанды интеллект пен цифрлық даму бойынша жеке министрлік құру туралы ұсынысы – өте орынды әрі уақыт талабы. Себебі цифрландыру тек онлайн қызметтермен шектелмейді. Ол – медицинадағы жасанды интеллект, өнеркәсіптегі автоматтандыру, білім берудегі жаңа тәсілдер. Мұның бәрі орталықтандырылып, үйлестірілсе – нәтиже әлдеқайда тиімді болады.

Осы орайда «AMANAT» партиясының «Қарызсыз қоғам» жобасының сәтті жүзеге асып жатқаны – цифрлық шешімдердің әлеуметке нақты пайда әкелетінінің дәлелі. Бұл жоба азаматтардың қаржылық сауаттылығын арттырып, цифрлық құралдар арқылы қарыздан арылуға көмектесіп отыр. Мұндай бастамалар – цифрлық мемлекеттің тірегі.

Жастардың IT саласына қызығушылығы, стартаптарға ұмтылысы – болашақтың жарқын көрінісі. Мемлекет оларға қолдау көрсетіп, білім беру жүйесіне жасанды интеллектті енгізу арқылы жаңа буынды дайындауы тиіс.

Бірақ ең бастысы – цифрлық сауаттылық. Әрбір азамат, әрбір маман жаңа технологияларды меңгеруі керек. Сонда ғана цифрландыру шын мәнінде жалпыға ортақ сипатқа ие болады.

Алдағы үш жылда бізге батыл қадамдар мен нақты әрекеттер қажет. Қазақстан бұл жолда табысты болатынына сенемін. Ең бастысы – қарқыннан таймау!

Жумадилова Сайрангүл Ахметкәрімқызы,

«AMANAT» партиясы Шығыс Қазақстан облыстық филиалының Төрағасы