Жөндеу жұмыстарынан кейін автмобиль жолының 100 шақырымнан асатын бөлігі пайдалануға берілді, деп хабарлайды Buqara.kz сайтының тілшісі.

"ҚазАвтоЖол" ҰК" АҚ облыстық филиалының мәліметінше, республикалық маңызы бар Талдықорған-Қалбатау-Өскемен тасжолын қайта жаңарту аясында 971-ші шақырымнан 1073-ші шақырымға дейінгі аралықта жалпы ұзындығы 102 шақырым болатын үш жол учаскесінің құрылысы аяқталды.
Бұл учаскелер Қалбатау мен Өскеменді байланыстырады. Қазір жол толық пайдалануға берілді.
Жаңартылған жолдың 5 шақырымы I техникалық санатқа сәйкес келеді — бұл жоғары жылдамдықтағы қозғалысқа арналған жол. Ал қалған 97 шақырым жол II санатқа жатады. Мұнда рұқсат етілген ең жоғары жылдамдық — сағатына 120 шақырым.
Сонымен қатар әр 10 шақырым сайын бақылау камералары орнатылған. Екі ақылы арка және көлік құралдарының салмағын өлшейтін жүйе қарастырылған.