Жұмысшы мамандықтар жылы аясында 15 қазанда Д. Серікбаев атындағы ШҚТУ-дың колонна залында ШҚО Білім басқармасы ШҚО әкімдігі мен ҚР Оқу-ағарту министрлігі жанындағы «Talap» КЕАҚ қолдауымен колледж педагогтері мен жұмыс берушілердің қатысуымен салалар бойынша республикалық кәсіби шеберлік форумын ұйымдастырды, деп хабарлайды Buqara.kz сайтының тілшісі.

Форум ШҚО әкімінің орынбасары Ербол Нұрғалиевтің қатысуымен Жұмысшы мамандықтар жылы аясындағы өңірлік іс-шаралар жоспарын іске асыру шеңберінде өтті.

Форумның мақсаты – мамандарды қазіргі заманғы стандарттар мен жұмыс берушілердің талаптарына сәйкес сапалы даярлауды қамтамасыз ету.

Форумға «Talap» КЕАҚ, ШҚО Кәсіпкерлер палатасы, өңірдегі оқу орын орындарының өкілдері, Астана мен Алматы қалаларынан, Ақтөбе, Қызылорда, Жамбыл, Түркістан, Маңғыстау, Қарағанды, Абай және Шығыс Қазақстан облыстарынан келген колледж директорлары мен педагогтер қатысты.

Форум жұмысына әлеуметтік серіктестер – «Казцинк», Үлбі металлургиялық зауыты, «Гидросталь», Өскемен жылу желілері және басқа да кәсіпорындар қатысты.

Форум қатысушыларын ШҚО әкімінің орынбасары Ербол Нұрғалиев салтанатты түрде қарсы алды. Өз сөзінде ол өңір колледждерінің жұмыс берушілермен өзара тиімді серіктестігін атап өтіп, кәсіпкерлер палатасына, жұмыс берушілерге және колледждерге экономиканың жедел өсуіне және еңбек нарығының сұраныстарына байланысты кадрларды жедел даярлау мәселелерін бірлесіп пысықтауды ұсынды.

«Talap» КЕАҚ әлеуметтік әріптестік басқармасының басшысы Н.Д. Жанайдаров ТжКБ жүйесінде білікті кадр даярлауда бизнестің рөлі туралы баяндама жасады. 

Білім басқармасы басшысының орынбасары А.А. Ақылбек ШҚО ТжКБ ұйымдарының жұмыс берушілермен тиімді өзара іс-қимыл моделін таныстырды.

Форум бағдарламасы мазмұнды болды. Шара барысында кәсіби шеберліктің үздік тәжірибелерін тарату мәселелері талқыланды. Спикерлер білікті кадр даярлаудағы жұмыс берушілердің рөлі, дуальды оқыту аясындағы колледждер мен кәсіпорындардың ынтымақтастығы, білім берудегі инновациялық тәсілдер, инклюзивті білім беру және түлектерді жұмыспен қамтуға бейімдеу, білімді цифрландыру және кадр даярлаудың жаңа тәсілдері бойынша тәжірибелерімен бөлісті.

Форум бизнес пен білім беру өкілдерінің ел экономикасы үшін сапалы кадр даярлау жолындағы ашық алаңына айналды.

Форум бағдарламасы 19 құзыреттілік бойынша 120-дан астам педагогтің қатысуымен өңіраралық кәсіби шеберлік байқауы өтіп жатқан колледж базаларында жалғасады.