Осы жылдың алғашқы бес айында облыс халқының саны 2000-нан астам адамға азайған, деп хабарлайды Buqara.kz сайтының тілшісі.

ҚР Ұлттық статистика бюросының мәліметіне сүйенсек, Шығыс Қазақстан облысында 2026 жылдың басында  халық саны 718 995-ке жетті. Ал 1 маусымға қарай бұл  көрсеткіш 716 979-ға азайды.
Тұрғындар саны төмендеуінің негізгі себебі - көші-қон. Қаңтар-мамыр айларында аймақтағы көші-қон сальдосы -1442 болды. 
Облыста халықтың табиғи азаюы да байқалды. Ұлттық статистика бюросының ақпаратынша, қаңтар-мамыр айларында табиғи өсім -574 болды, яғни өлім саны туу санынан 574-ке асып түсті.
Бұдан бөлек, қалаларда халық саны 486 480-нен 485 933-ке дейін, ауылдарда 232 515-тен 231 046-ға дейін азайды. 
Жалпы Қазақстан бойынша халық саны бес айда 76 157-ге өсіп, 1 маусымдағы жағдай бойынша 20 575 979 адамға жетті.