ШҚО Төтенше жағдайлар департаментінің мамандары 362 білім беру нысанын тексеріп, 2392 өрт қауіпсіздігі ережесін бұзу дерегін анықтады, деп  Buqara.kz сайтының тілшісі.

Белгілі болғандай, өңірде барлығы 671 білім беру нысаны бар. Мамандар профилактикалық мониторинг аясында олардың 362-сін тексерді. Мекеме басшыларына бұзушылықтарды жою мерзімдері көрсетілген бұйрықтар берілді, ал 286 нысанға жедел әрекет ету шаралары қолданылды.
Мамандар анықтаған мәселелер: автоматты өрт дабылының дұрыс жұмыс істемеуі, бастапқы өрт сөндіру жабдықтарының жеткіліксіздігі және өрт сөндіру сумен жабдықтаудың болмауы немесе дұрыс іске қосылмауы.
Эвакуация жолдарын пайдаланудағы бұзушылықтар, соның ішінде кедергілер, өрт қауіпсіздігі талаптарына сәйкес келмейтін материалдарды пайдалану және басқа да бұзушылықтар анықталды. 
ҚР Әкімшілік құқық бұзушылық туралы кодексінің 462-бабының 3-бөлігі бойынша 29 әкімшілік іс сотқа жолданды.
Азаматтық қорғаныс қызметкерлері білім беру мекемелерінің басшыларына анықталған бұзушылықтарды жою және ғимараттарды, құрылыстарды қауіпсіз жағдайға келтіру бойынша практикалық көмек көрсетуде.
Оқушылар арасында да профилактикалық жұмыстар да жүргізілуде. Жыл басынан бері мамандар білім беру мекемелерінде 101 интерактивті өрт қауіпсіздігі сабағын өткізді. Тағы 239 ашық сабақ 170 мектепте ұйымдастырылды, оған шамамен 3000 оқушы қатысты. Сондай-ақ оқушыларға өрт сөндіру бекеттері мен өрт сөндіру орталықтарына 116 экскурсия ұйымдастырылды.
Анықталғандай, жыл басынан бері аймақтағы білім беру мекемелерінде бір өрт тіркелді. Өрт Өскемендегі орта мектептегі 20 шаршы метр аумақтағы жиһаз бен кеңсе жабдықтарын зақымдады. Кінәлілер әкімшілік жауапкершілікке тартылды.
Мамандар білім беру мекемелерінің әкімшілігін автоматты өрт дабылының, түтін шығарудың, өртті сөндірудің және эвакуация туралы хабарлау жүйелерінің дұрыс жұмыс істеуіне ерекше назар аударуға шақырады.