Қазақстандағы ақылы жолдарды пайдаланғанда төлем тәсілін дұрыс таңдау арқылы шығынды азайтуға болады. Жүргізушілерге алдын ала төлем, абонемент және RFID-белгі қолжетімді. Бірқатар ақылы учаскеде жол жүру құны төлемнің сапарға дейін немесе одан кейін жасалуына байланысты өзгереді, деп хабарлайды Buqara.kz тілшісі KAZINFORM сайтына сілтеме жасап.

«Қазавтожол» мекемесінің хабарлауынша, үнемдеудің ең қарапайым жолы – көлік балансын сапарға дейін толтыру. Мысалы, ұзындығы 60,75 шақырым болатын Щучинск – Көкшетау ақылы учаскесінде жеңіл көлік үшін алдын ала төлем шамамен 117,21 теңге, ал кейін төленсе 140,56 теңге болады.

Жүк көтергіштігі 15 тоннадан асатын жүк көлігі үшін бұл сома тиісінше шамамен 2 495,1 және 2 940,57 теңгені құрайды. Тұрақты қатынайтын көліктер үшін, әсіресе жүк тасымалдаушыларға мұндай айырмашылық айтарлықтай үнем береді.

Алдын ала төлем жасау тәртібі қарапайым: ақылы учаскеге кірмей тұрып, көліктің мемлекеттік тіркеу нөміріне байланыстырылған баланста қажетті қаражат болуы керек. Сондықтан алыс жолға шығар алдында балансты тексеріп, қажет болса алдын ала толықтырған жөн. Шоттағы қаражат пен төлемдер тарихын KazToll жеке кабинеті арқылы бақылауға болады.

Ақылы жолдарды тұрақты пайдаланатын жүргізушілер үшін «ҚазАвтоЖол» RFID-белгілерді енгізді. Белгі көлікке орнатылып, оның мемлекеттік тіркеу нөмірі мен пайдаланушының жеке шотына байланыстырылады. Көлік ақылы учаскеден өткен кезде жүйе оны автоматты түрде танып, төлемді баланстан есептейді.

RFID-белгінің өзі қосымша жеңілдік бермейді. Оның басты артықшылығы – төлем үдерісін автоматтандыру. Жүргізушіге әр сапар сайын жеке төлем жасаудың қажеті жоқ. RFID-белгілер ақы алу пункттерінде тегін беріледі.

Шығынды азайтудың тағы бір жолы – абонемент. Ол тиісті ақылы жол учаскелеріне іргелес елді мекендерде тіркелген көлік құралдарына арналған. Абонементті 30 немесе 365 күнге рәсімдеуге болады. Бір бағытпен күн сайын қатынайтын жүргізушілер үшін әр сапарды жеке төлегеннен гөрі бұл тәсіл әлдеқайда тиімді болуы мүмкін.

Қысқаша айтқанда, ара-тұра сапарға шығатын жүргізушілерге – алдын ала төлем, тұрақты пайдаланушыларға – RFID, ал ақылы жолдарға іргелес елді мекен тұрғындарына абонемент тиімді.

-«ҚазАвтоЖол» ҰК» АҚ төлем жасау кезінде тек ресми арналарды пайдалануды және SMS немесе мессенджерлер арқылы келген күмәнді сілтемелерге өтпеуді ескертеді. Балансты, берешекті және ақылы жолдар туралы ақпаратты KazToll жүйесінің ресми сервистері арқылы немесе 1403 байланыс орталығына хабарласып білуге болады,-делінген хабарламада.

Басты қағида қарапайым: ақылы жолмен сапарға шығасыз ба – балансты алдын ала тексеріңіз. Бұл әрі ыңғайлы, әрі тиімді.

Осыған дейін Қазақстанда жақсы жағдайдағы жергілікті жолдардың үлесі 91%-ға жеткені туралы жаздық.