Алтай қаласында «Таза Қазақстан» экологиялық бастамасы мен «Жастар – таза әрі көркейген Қазақстан үшін!» акциясы аясында волонтерлер, студенттер мен ауданның белсенді жастары Қоғамдық кеңес мүшелерімен кездесті, деп хабарлайды Buqara.kz сайтының тілшісі.

Іс-шараны Алтай ауданының Жастар ресурстық орталығы ұйымдастырды. Кездесудің негізгі тақырыбы – аудандағы экологиялық жауапкершілік пен қоршаған ортаны қорғау мәселелері. Қатысушылар жастардың табиғатқа ұқыпты қарау мәдениетін қалыптастыру, қоғамдық орындардың тазалығын сақтау және өздері өмір сүріп жатқан ортаға жауапкершілікпен қараудағы рөлін талқылады.
Қоғамдық кеңес мүшелерімен өткен ашық диалог барысында азаматтық жауапкершілікке және әр тұрғынның туған өлкені дамытуғаа қосатын жеке үлесіне ерекше назар аударылды. Экологиялық мәдениет тек сенбіліктерге қатысудан ғана емес, күнделікті тәртіптен, қоршаған ортаға құрметпен қараудан басталатыны атап өтілді.

Іс-шараның практикалық бөлігі Тәуелсіздік аллеясында өтіп, жастар аумақты тазалап, абаттандыру жұмыстарын жүргізді.
«Таза Қазақстан» бастамасы практикалық экологиялық шараларды тазалық және қоршаған ортаға құрмет мәдениетін қалыптастыруға бағытталған міндеттермен ұштастырады. Жастар үшін мұндай бастамаларға қатысу – әлеуметтік белсенділік танытып қана қоймай, өз ауданының дамуына нақты үлес қосу мүмкіндігі.
Алтайдағы кездесу аға буын мен жастар арасындағы өзара пікір алмасуға арналған маңызды алаңға айналды. Қатысушылар заманауи экологиялық жауапты азамат қандай болуы керектігін және нақты істер арқылы қолайлы жағдай жасайтын ортаны қалай қалыптастыруға болатынын талқылады.