2026 жылдың 3 тоқсанының қорытындысы бойынша Қазақстанда жаңартылатын энергия көздері (ЖЭК) өндірген электр энергиясының көлемі 7,8 млрд кВт·сағат болды. Бұл 2025 жылдың сәйкес кезеңімен салыстырғанда 20% жоғары, деп хабарлайды Buqara.kz сайтының тілшісі KAZINFORM сайтына сілтеме жасап. 

Энергетика министрлігі мәліметінше, электр энергиясының негізгі көлемі жел электр станцияларына тиесілі – 4,9 млрд кВт·сағат. Күн электр станциялары 1,9 млрд кВт·сағат, шағын су электр станциялары 993 млн кВт·сағат электр энергиясын өндірді. Жалпы электр энергиясын өндірудегі ЖЭК үлесі 8,5%-ға жетті.

Бірінші жартыжылдықтың қорытындысы бойынша бұл көрсеткіш 8,08% болған. Бұл ретте елдегі ЖЭК объектілерінің белгіленген қуаты 3,7 ГВт-қа жетті. Белгіленген қуат құрылымында жел электр станцияларының үлесі 2 ГВт, күн электр станцияларының үлесі 1,3 ГВт, шағын су электр станцияларының үлесі 313 МВт.

Осылайша, Қазақстанда жаңартылатын энергия көздерінен электр энергиясын өндіру көлемі өсіп жатыр. Бұл олардың елдің энергетикалық теңгеріміндегі үлесін арттыруға және таза энергетиканы одан әрі дамытуға ықпал етеді.