Қазақстанда өсімдік майы өндірісі айтарлықтай өсті, деп хабарлайды Buqara.kz сайтының тілшісі inbusiness.kz сайтына сілтеме жасап.
Жаңа маркетингтік маусымның алғашқы екі айында елде 141 мың тоннадан астам өнім өндірілген. Бұл өткен кезеңмен салыстырғанда 39%-ға көп. Әсіресе күнбағыс майын өндіру қарқыны артқан.
Саладағы өсімге бірнеше фактор әсер еткен. Атап айтқанда, күнбағыс егілетін жер көлемінің ұлғаюы, май өңдеу зауыттары мен фермерлер арасындағы әріптестіктің нығаюы және өндірістік қуаттардың артуы маңызды рөл атқарған. Сондай-ақ кәсіпорындар қосылған құны жоғары өнім шығаруға басымдық беріп отыр.
Отандық май өнімдеріне шетелдік нарықтарда сұраныстың тұрақты болуы да өндіріс көлемінің артуына ықпал еткен.
Биыл Қазақстанда мақта алқаптарын есептемегенде, майлы дақылдар егілген жер көлемі 5,179 млн гектардан асты. Бұл былтырғы көрсеткіштен 30%-ға жоғары.
Қазір еліміздегі май өңдеу кәсіпорындары жылына 5,4 млн тоннадан астам майлы дақыл тұқымын өңдей алады. Оның ішінде күнбағыс тұқымын өңдеу қуаты 4,6 млн тоннаға жетеді.
Алайда шикізат көлемі жеткіліксіз болғандықтан, кәсіпорындар өндірістік мүмкіндіктерін толық пайдалана алмай отыр.
Сала өкілдері алдағы жылдары шикізатты терең өңдеуге және дайын өнім өндірісін ұлғайтуға басымдық берілетінін атап өтті.
2026–2028 жылдары май тазарту қуаттарын 2,1 есеге арттырып, жылдық көлемін 1 млн тоннадан асыру жоспарланған. Сонымен бірге өлшеп-оралған тазартылған күнбағыс майының өндірісін 2,4 есеге көбейту көзделіп отыр.
Бұдан бөлек, 2027–2028 жылдары жылына 72 мың және 50 мың тонна өнім өндіретін өсімдік майы мен маргарин зауыттарын іске қосу жоспарланған.
Жаңа жобалар отандық май өнеркәсібінің әлеуетін арттырып, Қазақстанның өңделген өнім экспортындағы үлесін ұлғайтуға мүмкіндік береді.
Пікірлер