Бүгін ҚР Конституциясының 30 жылдығы мен қала күніне орай облыс әкімі Нұрымбет Сақтағанов пен қала басшысы Алмат Ақышов Беларусьтен әкелінген трамвайлардың сапасын тексерді, деп хабарлайды Buqara.kz сайтының тілшісі. 

Қалаға Беларусьтегі «БелКоммунМаш» зауытында жасалған жасыл, көк, қызыл түсті үш трамвай жеткізілген еді. Олардың әрқайсысы заманауи үлгіде жабдықталған: желдеткіш, 8 бейнебақылау камерасы, мүмкіндігі шектеулі жандарға арналған пандус бар. Бір рельсті көлік 130 жолаушыға дейін тасымалдай алады. 
Аймақ басшысы Нұрымбет Сақтағанов трамвайлардың ең қауіпсіз әрі тиімді көлік құралы және шаһар тарихында ерекше орын алатынын жеткізді. Сондай-ақ ол рельстерді жөндеу қажеттігін алға тартты. 
Анықталғандай, қазір желіге күн сайын 9 трамвай шығады. Олардың әрқайсысы 1000 жолаушыны тасымалдайды. Ал жаңа трамвайлар ONAY жүйесіне қосылғаннан кейін ғана жолға шығады. 

Қымбат МУХАМАДИЕВА