Республика алаңындағы мереке әдеттегідей ән мен күйге толы концерттік бағдарламамен басталды, деп хабарлайды Buqara.kz сайтының тілшісі.

Сахна төріне көтерілген облыс әкімі Нұрымбет Сақтағанов жиналған жұртшылықты айтулы күнмен құттықтап, елдік пен бірліктің мәнін атап өтті.
— Құрметті жерлестер! Баршаңызды ҚР Конституциясының 30 жылдық мерейтойымен шын жүректен құттықтаймын. Ата Заңымыз – Тәуелсіз Қазақстанның берік құқықтық негізі, елдігіміздің айнымас тұғыры. Онда адам өмірі мен бостандықтары мемлекеттің ең қымбат қазынасы ретінде айқындалған. Конституциямыз саяси тұрақтылықты қамтамасыз етіп, демократиялық қағидаттарды орнықтырды. Ол – мемлекет дамуының басты бағдары, – деді аймақ басшысы.
Мерекелік шара аясында бал фестивалі ұйымдастырылды. Мұнда өңірдің түкпір-түкпірінен келген ара өсірушілер өз өнімдерін ұсынып, табиғи балдың сан түрін көпшілікке ұсынды.
— Біз Үлкен Нарын ауданынан келдік. Бұл кәсіппен айналысқаныма 15 жылдай болды. Бүгінгі жәрмеңкеге балдың бірнеше түрін әкелдік. Бағасы 3000 теңгеден басталады. Мұндай шаралар халықтың көңілін көтеріп қана қоймай, кәсіпкерлер үшін де үлкен мүмкіндік береді. Жыл сайын сұраныс артып келеді, – дейді кәсіпкер Ануар Мусобаев.
Сонымен қатар алаңда қолөнершілер жәрмеңкесі де өтті. Шеберлер жасаған ұлттық нақыштағы әшекей-бұйымдар мен тұрмыстық заттарға қызығушылар көп болды.
Мерекелік бағдарламаның ең қызықты сәттерінің бірі – дәстүрлі күш сынасуға арналған "Өскемен батыры" сайысы. Байқауға Шығыс Қазақстан өңірінің мықтыларымен қатар, көршілес Абай облысынан да спортшылар келіп қатысты. Сайыс құрметті қонағы ретінде күш сынасудан рекорд орнатқан актер әрі меценат Сергей Валерьевич шақырылды.
— "Өскемен батыры" жарысын Конституцияның 30 жылдық мерейтойына арнап өткізуді жөн көрдік. Бұл – қазақтың батырлық рухын дәріптеп, ата-бабамыздың ерлік дәстүрін жаңғырту. Бүгінгі алаңда нағыз мықтылардың есімі анықталатын болады, – деді ұйымдастырушы Дамир Жанболатұлы.
Жарыс төрт кезеңнен тұрды. Алдымен қатысушылар 100 келілік ағашты көтерсе, келесіде 120 келілік дөңгелек домалатып, тіпті автобус сүйреді. Батырлардың күш-жігерін тамашалауға жиналған халық ерекше ықылас танытты.
Қала тұрғындары ұйымдастырылған мерекелік шараға ризашылықтарын білдірді.
— Бүгінгі мереке өте жоғары деңгейде өтіп жатыр. Бал фестивалі, қолөнершілер жәрмеңкесі, батырлар сайысы – барлығы халық үшін жасалған игі шара. Ата Заңымыздың 30 жылдығы құтты болсын! Еліміз аман, жұртымыз тыныш болғай, – деді қала тұрғыны Зейне Асаубаева.
Конституция күніне арналған мерекелік шаралар қала тұрғындарына көтеріңкі көңіл-күй сыйлап, Ата Заңның мемлекет пен қоғам өміріндегі айрықша орнын тағы бір мәрте айқындай түсті.

Әдемі АМАНГЕЛДІ