Бүгін «Туған жер - алтын бесігім» облыстық жобасы аясында Тарбағатай ауданының мәдени күндері басталды. Осыған орай С.Аманжолов атындағы ШҚУ-да «Ауылға бағыт» бос жұмыс орындары жәрмеңкесі ұйымдастырылды, деп хабарлайды Buqara.kz сайтының тілшісі.

Іс-шараға жоғары және арнаулы оқу орындарының жоғарғы курс студенттері қатысты.

Тарбағатай ауданы әкімінің орынбасары Ержан Советбекұлының айтуынша, жеке аудан болып құрылған үш жылдың ішінде түрлі инфрақұрылымдық жобалар іске асырылып келеді.

- Қазір ауданда 53 бос жұмыс орны бар. 8 мектепте мұғалім жетіспейді, әсіресе математика сынды негізгі пәндер бойынша мамандар тапшы. Сондай-ақ аудан әкімдігінің аппаратына есепші, ішкі істер органдарына мамандар, әлеуметтік және оңалту орталықтарына қызметкерлер қажет. Осы мақсатта бүгін біз С.Аманжолов атындағы ШҚУ-ға келіп, түлектерге жұмыс ұсынудамыз. «Дипломмен ауылға» бағдарламасы аясында да жас мамандарды қолдау жалғасуда, - деді Ержан Советбекұлы. 

С.Аманжолов атындағы ШҚУ Мансап орталығының жетекшісі Жанель Болатқызының сөзінше, бос жұмыс орындары жәрмеңкесі жыл сайын дәстүрлі түрде өтеді.

- «Ауылға бағыт» жобасы аясында әр аудан университет және колледж түлектеріне жұмыс ұсынады. Бұл – жас мамандар үшін тиімді алаң. Университет түлектері үшін Өскеменде ғана емес, облыстың барлық ауданында жұмысқа орналасуға мүмкіндік бар, - деді ол.

Жәрмеңке барысында студенттерге білім, медицина, әлеуметтік сала және мемлекеттік қызмет бойынша бірқатар бос жұмыс орны ұсынылды.

Ұлжан СЕЙІТХАНОВА