Кеше Шығыс Қазақстан облыстық филармониясында Тарбағатай ауданынан келген өнерпаздардың гала-концерті ұйымдастырылды, деп хабарлайды Buqara.kz сайтының тілшісі.

Гала-концерт басталмас бұрын филармония фойесінде ауқымды көрме ашылып, ауданның қолөнершілері жасаған туындылар көпшілік назарына ұсынылды. Көрмедегі ең ерекше жұмыстардың бірі – асықтан жасалған торсық. Ақжар өнер мектебінің ұстазы Мейір Жетпісовтің айтуынша, торсық 1515 қой мен ешкінің асығынан құрастырылған.

— Біз бұл көрмеге 1515 асықтан жасалған торсық пен қыш құмыраларды әкелдік. Құмыралардың сырты түрлі иероглифтермен өрнектелген. Ал торсықты Жетіарал мектеп–балабақшасы кешенінің ұжымы жасаған. Оның биіктігі – 113 см, ені – 100 см. Асықтар желіммен жапсырылып, сырты арнайы тор материалмен қапталды, — деді ол.

Анықталғандай, торсықты жасауға қажетті асықтарды ауданның 34 мектебі жинап берген.

Көрмеде киізден жасалған суреттер, ою-өрнек стиліндегі қазы-қарта бейнесі, ұлттық нақыштағы киімдер, әшекей бұйымдар мен сырмақтар да көрерменге ұсынылды.

— Ақжар ауылы балалар өнер мектебінен келдік. Маған берілген тапсырма бойынша қазақы нақыштағы, ою-өрнекпен безендірілген қазы-қарта бейнесін ұсынудамын, — деді ұстаз Балнұр Советханқызы.

Аудан әкімі Дархан Жөргекбаевтың айтуынша, Тарбағатай ауданы

“Туған жер – алтын бесігім” жобасы аясында тұрғындар мен қонақтарға кең көлемді мәдени бағдарлама алып келген.

— Бүгінгі гала-концертте 100-ге жуық өнерпаз өнер көрсетеді, — деді аудан басшысы.

Концерт шымылдығы Абайдың 180 жылдығына арналған “Адамзаттың бәрін сүй, бауырым деп…” атты композициямен ашылды. Одан кейін дәстүрлі әншілер мен айтыскерлер арнау айтып, Ақжар халықтық ұлт аспаптар оркестрі күмбірлі күй орындады. Сонымен қатар белгілі әнші Апош Сарбаз да көрерменді әсем әнімен қуантты.