2025 жылдың соңында Самар ауданына 24 жас маман келді. Оның ішінде 4 дәрігер мен 20 педагог бар, деп хабарлайды Buqara.kz сайтының тілшісі. 

Бұл ауданның әлеуметтік саласын айтарлықтай нығайтты. Алайда кадрлардың мұндай көлемде келуіне байланысты тұрғын үй мәселесі туындады. Себебі қолданыстағы тұрғын үй қоры бұған толық дайын болмады. 
Аудан басшылығы бұл мәселені жедел түрде шешуге кірісті. Қаңтар айында екі мұғалімге қызметтік пәтер берілді.
- Өтінім беру кезінде жас мамандардың мұндай көп келуін күтпедік. Сондықтан қазір оларды орналастыру мәселесін кезең-кезеңімен шешіп жатырмыз. Сонымен бірге жастардың біздің ауданды таңдағанына қуаныштымыз және жаңа бастамашыл мамандарды қабылдауға дайынбыз, – деді Самар ауданының әкімі Серік Жеңісов.
Аудандық білім бөлімінің ақпаратынша, аудан мектептері мен балабақшаларына орыс және қазақ тілі мен әдебиеті, бастауыш сыныптар, ағылшын тілі, дене шынықтыру, биология, химия, география және технология пәндерінің жас мұғалімдері жұмысқа тұрды. Олар профильдік білімге ие және тәлімгерлердің қолдауымен еңбек етуде.
Қызметтік тұрғын үйлер №1 Самар орта мектебінің мұғалімдері Аймарал Мадетберген мен Анель Ережеповаға берілді. Олар бұған дейін пешпен жылытылатын жалдамалы тұрғын үйде уақытша тұрғандарын айтты.
- 16 қаңтарда маған жөндеуден өткен, жылы әрі жайлы қызметтік пәтер берілді. Енді жұмысқа толық көңіл бөле аламын. Жас мамандарға көрсетіліп жатқан қолдау мен қамқорлық үшін алғысымды білдіремін, – деді Анель Ережепова.
Еске салайық, былтыр ауданда «Бірқабатты Шығыс» бағдарламасы бойынша 14 екі пәтерлі тұрғын үй салынып, мемлекеттік қызметшілерге арналған 8 пәтер қалпына келтірілді.
Биыл қолданыстағы бағдарламалар аясында тұрғын үй құрылысының көлемін арттыру, халықты әлеуметтік қорғау жүйесі үшін 6 екі пәтерлі үйді сатып алу жоспарланып отыр. Бұдан бөлек, мемлекеттік қызметшілерге арналған тұрғын үйлерді сатып алу және Бақраев көшесі, 17Б мекенжайындағы көппәтерлі тұрғын үй кешеніне (8 пәтер) жөндеу көзделген.