Қазақстанда кадр тапшылығы бар өңірлерге ерікті түрде қоныс аудару бағдарламасы жаңартылып, оған қатысушыларға көрсетілетін мемлекеттік қолдау күшейтілді, деп хабарлайды Buqara.kz тілшісі KAZINFORM сайтына сілтеме жасап.

Еңбек және халықты әлеуметтік қорғау министрлігінің мәліметінше, енді экономикалық ұтқырлық сертификатының ең жоғары мөлшері 7 млн теңгеге дейін (1 625 АЕК) ұлғайтылды. Бұл қаражатты жаңа өңірден тұрғын үй сатып алуға пайдалануға болады.

— Бағдарлама аясында қоныс аударушыларға көшу шығындарына субсидия беріледі, тұрғын үйді жалдау мен коммуналдық қызмет ақысы өтеледі. Сондай-ақ жұмысқа орналасуға қолдау көрсетіліп, жаңа өңірге көшпей тұрып-ақ бос жұмыс орындарын таңдау мүмкіндігі қарастырылған, — делінген хабарламада.

Биылдан бастап бағдарламаға тек жұмыссыз азаматтар ғана емес, еңбек нарығында сұранысқа ие мамандар мен шаруа және фермер қожалықтарының басшылары да қатыса алады.

Бағдарлама толық цифрлық форматқа көшірілді. Өтініш беру шарттарымен, сұранысқа ие мамандықтармен және бос жұмыс орындарымен migration.enbek.kz порталында танысуға болады.

Министрліктің дерегінше, 2017 жылдан бері бағдарламаға 73,9 мың адам қатысып, олардың 31 мыңы тұрақты жұмыспен қамтылған.